Սերժ Սարգսյանը «հարվածը» փոխանցեց կառավարությանը

ՀԴԿ ղեկավար Արամ Սարգսյանից  armlur.am լրատվականը փորձեց պարզել` արդյոք սպասելի էր  վարչապետի հրաժարականը:

Արամ Սարգսյանը կարծում է, որ Տիգրան Սարգսյանն ու ՍԴ նախագահն ավելի խելոք կգտնվեն ` կուտակային այս օրենքի  համար ճիշտ ուղի կընտրեն. «Կուտակային այս օրենքի հետ կապված` արդեն պարզ էր, որ ՍԴ նախագահ Գագիկ Հարությունյանը ոչ թե 5-րդ կուրսի ուսանողներին, այլ 5-րդ դասարանի աշակերտներին էր բացատրում` ոնց է պետք անել: Դրանից հետո չընդունել  և չասել` ով պետք է  պատժվի և շարունակել պնդել, բնականաբար նախագահն արդեն իր  վրայից հարվածը փոխանցեց կառավարությանը»:

-Այսինքն` Տիգրան Սարգսյանին Սերժ Սարգսյանը քաղաքական  «ժերտվա» տվե՞ց:

-Չէ, նա զոհ չէ: Եթե Տիգրան Սարգսյանը չի կարողանում ճիշտ կողմնորոշվել և ճիշտ  ձևով արձագանքել, դա իր մեղավորությունն է: Ի վերջո, կենսաթոշակային նոր օրենքը պարտադրված օրենք էր, որի ներդրման համար ծախսվել էր 128 մլն դոլար: Թե դա  դրամաշնորհ է, թե վարկ` պետք է պարզել: Սերժ Սարգսյանը հարվածի տակ էր և ինքը քայլ պետք է աներ, և արեց: Պետք է կառավարությունը  հրաժարական տար այն ժամանակ, երբ նրանք արդեն պատրաստ էին ստորագրել Մաքսային միության պայմանագիրը: Այդ դեպքում միայն իրենց կասեին հաջողություն:

-Պրն Սարգսյան, ո՞ւմ  կուզենայիք  տեսնել վարչապետի  պաշտոնում, հավանական թեկնածուներից ո՞ւմ եք տեսնում այդ պաշտոնում:

-Ես  չէի ուզենա այս պահին անուններ տալ, բայց  կասեի` ինչ վարչապետ եմ ուզում տեսնել: Եթե Սերժ Սարգսյանը գնար կոսմետիկ փոփոխությունների և ինչ-որ մեկին նշանակեր, դա ինձ չի հետաքրքրում, բայց եթե խոսքը համակարգային փոփոխությունների մասին է, այդպիսի վարչապետը պետք է կոտրի  մենաշնորհային-օլիգարխիկ  համակարգը` ունենալով նախագահի աջակցությունը, միջազգային կապեր ունենա, որ  կարողանա  դա իրականացնել: Վարչապետը պետք է փոխի նաև վարկային քաղաքականությունը: Երկիրը 4,5 կես միլիարդ պարտքի տակ է, բայց դրանից ոչ մի լումա չի գնացել մեր տնտեսությանը: Իսկ եթե լինելու է այնպես, ինչպես հիմա, ապա վարչապետը լինելու է այլ ֆիգուր:

-Որքանո՞վ եք հավանական համարում, որ նոր կառավարությունը կձևավորի չորս ուժերից:

-Շատ հնարավոր է, քանի որ նրանք բոլորն էլ իրար հետ աշխատել են: Այդ չորս ուժերի մեջ ես առանձնապես տարբերություն չեմ տեսնում: Իսկ եթե դա կարվի միայն լարվածությունը թուլացնելու  համար, ապա դա  հաջողություն չի բերելու, քանի որ  իշխանությունը  չի փոխելու քաղաքական այն կուրսը, որը տանում է հիմա: Այդ չորս ուժերից ոչ ոք  շահագրգիռ չէ համակարգային փոփոխություններ անել, հետևաբար մեզ նման կառավարություն պետք չէ:

Սոնա Դավթյան