Դատախազությունը «ՔՊ»-ականներից հանցագործության մասին հաղորդում ստացե՞լ է

Այսօր ՀՀ ԱԺ «Քաղաքացիական պայմանագիր» խմբակցության ղեկավար Հայկ Կոնջորյանը, քարտուղար Արթուր Հովհաննիսյանը, նաև ԱԺ նախագահ Ալեն Սիմոնյանը հայտարարեցին, որ ԱԺ պատգամավոր Հովիկ Աղազարյանը պետական գաղտնիք պարունակող ինֆորմացիայի արտահոսք է արել:

ArmLur.am-ը այս հարցով դիմեց ՀՀ գլխավոր դատախազություն՝ պարզելու՝ ստացե՞լ է արդյոք ՀՀ գլխավոր դատախազը Աղազարյանի ենթադրյալ հանցանքի վերաբերյալ դիմում «ՔՊ»-ի կողմից և արդյո՞ք ՀՀ գլխավոր դատախազը հանրային հայտարարությունների հիման վրա հարուցել է քրեական վարույթ՝ ենթադրյալ պետական գաղտնիքի արտահոսքի առիթով:

ArmLur.am-ին ՀՀ գլխավոր դատախազությունից ասացին, որ հարցերին կպատասխանեն գրավոր, որը ստանալու դեպքում ArmLur.am-ը այն կհրապարակի։

Այս ամենում հետաքրքիրն այն է, որ 3 պաշտոնյա հանրային կերպով խոսում են ենթադրյալ հանցագործության՝ պետական գաղտնիքի արտահոսքի մասին, որն իրագործել է ԱԺ պատգամավորը, սակայն հարկ է արձանագրել, որ այս մասին որևէ պաշտոնյա հաղորդում չի ներկայացրել ՀՀ գլխավոր դատախազություն։

Աննա Սրապիոնյան