ԿԿՀ-Ն ԹԱՔՑՆՈ՞ՒՄ Է, ԹԵ՞ ԽՆԴԻՐԸ ՏԵԽՆԻԿԱԿԱՆ Է

Երկար ժամանակ է՝ ղեկավար չունեցող Կոռուպցիայի կանխարգելման հանձնաժողովի կայքը խափանումներով է գործում։ Ամիսներ առաջ համակարգն ընդհանրապես չէր գործում, իսկ այժմ  բաց հասանելի աղբյուրներին թույլ չի տալիս, որ մուտք գործեն համակարգ եւ տեսնեն 2011 թվականից մինչեւ 2021 թվականները ներկայացրած հայտարարագրերի տվյալները։

«Ժողովուրդ» օրաթերթը, բացի խնդրին առնչվելուց, բազմաթիվ ահազանգեր է ստանում, որ որոշ Հասարակական կազմակերպությունների չի հաջողվում մուտք գործել համակարգ։

Խաթարվել է նաեւ լրագրողերի աշխատանքը, քանի որ հայտարարագրերում առկա տվյալների տարիների միջեւ համեմատություններ չի հաջողվում իրականացնել։ Ավելին՝ ստեղծված իրավիճակը կասկածներ է առաջացրել, թե իշխանությունը դիտավորությամբ է համակարգը փակել, որպեսզի ավելացված եկամուտների մասին տեղեկությունները շատերին հասանելի չլինեն։

«Ժողովուրդ» օրաթերթին Կոռուպցիայի կանխարգելման հանձնաժողովից տեղեկացրին որ խափանումը տեխնիկական է։

«Քանի որ փոփոխված նոր համակարգը գործարկման փուլում է, մի փոքր տեխնիկական խնդիրներ կան։ Հավանաբար մոտ ժամանակներս խնդիրը կկարգավորվի»,- պաշտոնապես մեկնաբանեցին հանձնաժողովից։

Հարկ է նշել, որ 2025 հունվարի 1-ից մեկնարկում է 2024 թվականի հայտարարագրերի ներկայացման նոր փուլը, որի շրջանակում հայտարարագիր պետք է ներկայացնեն ՀՀ բոլոր աշխատող քաղաքացիները, ինչպես նաեւ փոքր ու միջին բիզնեսի ներկայացուցիչները։ Իսկ Կոռուպցիայի կանխարգելման հանձնաժողովի համակարգը մի քանի ամիս է անգամ նախկին հայտարարագրերը բեռնելու տեխնիկական միջոցներ չունի։

Իսկ ովքեր պիտի ներկայացնեին հայտարարագիր եւ ինչպես.

2023 թվականի համար պարտավոր էին հայտարարագիր ներկայացնել

ա) հանրային ծառայողները,

բ) այն անձինք, ովքեր բիզնեսով են զբաղվում՝ հիմնականում խոշոր բիզնեսի ներկայացուցիչները, փոքր եւ միջին  բիզնեսը դեռ չի մտնում այս ցանկում,

գ) այն մարդիկ, ովքեր բանկում փոխառություններ ունեն, օրինակ՝ հիփոթեքային վարկեր են վերցրել՝ 20 մլն դրամից ավելի։ Այդ երեք խումբն է 2024-ին 2023-ի համար հայտարարագիր են ներկայացրել»։

2024 թվականի համար պետք է 2025 թվականի հունվարի 1-ից հայտարարագիր ներկայացնեն բոլոր աշխատողները, ինչպես նաեւ փոքր ու միջին բիզնեսի ներկայացուցիչները։

Ի՞նչ է անհրաժեշտ եկամուտների հայտարարագիր ներկայացնելու համար։ ArmLur.am-ը ՀՀ պետական եկամուտների կոմիտեի կայքից տեղեկանում է՝ կա 2 տարբերակ։

Տարբերակ առաջին

Բջջային հեռախոսի միջոցով, ինչի համար անհրաժեշտ է.

ունենալ նույնականացման քարտ (ID Card), իսկ չունենալու դեպքում՝ ձեռք բերել այն ՀՀ ՆԳՆ Միգրացիայի եւ քաղաքացիության ծառայության տարածքային ցանկացած գրասենյակից։

Նույնականացման քարտով եւ բջջային հեռախոսով այցելել Ձեր կամ նախընտրելի այլ բջջային կապի օպերատորի ցանկացած սպասարկման կենտրոն, որտեղ բջջային հեռախոսահամարի քարտը (SIM) կփոխարինվի նոր քարտով, իսկ օպերատորին փոխելու դեպքում՝ կտեղադրվի նոր քարտ։

Բջջային կապի օպերատորի սպասարկող անձնակազմի օգնությամբ եւ Ձեր մասնակցությամբ ակտիվացնել էլեկտրոնային նույնականացումը։

Ակտիվացնել էլեկտրոնային ստորագրության ծառայությունը՝ կապի օպերատորի սպասարկման կենտրոնում, ինչպես նաեւ ինքնուրույն՝ վճարային տերմինալների միջոցով կամ այցելելով Էլեկտրոնային կառավարման ենթակառուցվածքների ներդրման գրասենյակի կայք։

Տարբերակ երկրորդ

Էլեկտրոնային կրիչ պարունակող նույնականացման քարտով, ինչի համար անհրաժեշտ է.

ունենալ մինչեւ 2023 թվականի փետրվարի 15-ը Միգրացիայի եւ քաղաքացիության ծառայության տարածքային գրասենյակից ստացած էլեկտրոնային չիպ պարունակող վավեր նույնականացման քարտ, որի հետ առանձին ծրարով տրամադրվել են PIN եւ PUK ծածկագրեր:

Ունենալ ընթերցող սարք, որը կարող եք նաեւ ձեռք բերել «Էլեկտրոնային կառավարման ենթակառուցվածքների ներդրման գրասենյակ» ՓԲԸ-ից։

Այցելելով կայք եւ հետեւելով ուղեցույցներին՝ ակտիվացնել էլեկտրոնային քարտը եւ ստանալ էլեկտրոնային ստորագրություն:

Անհրաժեշտ է ընդգծել, որ այժմ Միգրացիայի եւ քաղաքացիության ծառայության տարածքային գրասենյակները PIN եւ PUK ծածկագրեր չեն տրամադրում, անհրաժեշտ է մետենալ բջջային օպերատորի գրասենյակ։