Ինչպե՞ս խուսափել կուտակային կենսաթոշակային պահումներից

ԻՏՁՄ-ն դիմում ձև է ներկայացրել, որը Ձեր գործատուին ներկայացնելու դեպքում հնարավորություն կտա չկատարել կուտակային կենսաթոշակային մուծումները: Նշվում է, որ ապրիլի 2-ին կայացած ՀՀ Սահմանադրական դատարանի որոշման համաձայն՝ մարդու կամքին հակառակ ոչ ոք չի կարող նրա սեփականությունը հանդիսացող աշխատավարձից գանձումներ կատարվել: Դիմումի ձևը հետյալն է:

—————–

Ընկերության անուն
Տնօրեն ___________

Նույն ընկերության աշխատակից
Անուն, ազգանուն, հայրանուն
Հասցե՝ _____________________

ԴԻՄՈՒՄ

Հարգելի ———–

Ինչպես արդեն տեղյակ եք, սույն թվականի ապրիլի 2-ին ՀՀ Սահմանադրական դատարանը, քննության առնելով ՀՀ ԱԺ պատգամավորների դիմումի հիման վրա՝ «Կուտակային կենսաթոշակների մասին» ՀՀ օրենքի 5, 7, 8, 37, 38, 45 և 86-րդ հոդվածների սահմանադրականության վերաբերյալ գործով դիմումը, իր որոշման 1-5-րդ կետերով որոշել է «Կուտակային կենսաթոշակների մասին» ՀՀ օրենքի 5-րդ հոդվածի 1-ին մասի, 7-րդ հոդվածի 1-ին և 11-րդ մասերի, դրանց հետ համակարգային առումով փոխկապակցված՝ 13-րդ հոդվածի 2-րդ մասի դրույթները, 49-րդ հոդվածի 1-ին մասը, 2-րդ հոդվածի 6-րդ կետի, 44-րդ հոդվածի 1-ին մասը, 76-րդ հոդվածի 2-րդ մասը  ճանաչել ՀՀ Սահմանադրությանը հակասող և անվավեր:

ՀՀ սահմանադրական դատարանը սույն Որոշման 7-րդ կետով՝ ՀՀ Սահմանադրությանը հակասող ճանաչված իրավանորմերի ուժը կորցնելու վերջնաժամկետ է սահմանել 2014թ. սեպտեմբերի 30-ը:

Սակայն սույն Որոշման 6-րդ կետով՝ ՀՀ Սահմանադրական դատարանը որոշել է, որ «Կուտակային կենսաթոշակների մասին» ՀՀ օրենքի 7-րդ հոդվածի 2-10-րդ մասերի, 8, 37, 38, 45-րդ հոդվածների, 49-րդ հոդվածի 2-րդ մասի եւ 86-րդ հոդվածի վեճի առարկա դրույթները համապատասխանում են ՀՀ Սահմանադրությանը՝ սույն որոշման մեջ սահմանադրական դատարանի արտահայտած իրավական դիրքորոշումների շրջանակներում սահմանադրաիրավական բովանդակությամբ, համաձայն որի` դրանցով նախատեսված իրավակարգավորումները չեն կարող հիմքում ունենալ, մեկնաբանվել եւ կիրառվել մարդկանց հայեցողությունից անկախ նրանց սեփականության իրավունքի սահմանափակում ենթադրող իրավակարգավորման համատեքստում, իսկ կենսաթոշակային ֆոնդի կառավարիչների իրավունքները պետք է իրացվեն միայն համարժեք պարտավորություններով հավասարակշռման սկզբունքին համապատասխան։

Սույն Որոշման 8-րդ կետով ՀՀ Սահմանադրության 102-րդ հոդվածի երկրորդ մասի համաձայն սույն որոշումը վերջնական է եւ ուժի մեջ է մտնում հրապարակման պահից:

Սա նշանակում է, որ սույն որոշման եզրափակիչ մասի 6-րդ կետի համաձայն, մարդու կամքին հակառակ չեն կարող նրա սեփականությունը հանդիսացող աշխատավարձից գանձումներ կատարվել, այն ուժի մեջ է մտել հրապարակման պահից (որոշման եզրափակիչ մասը՝ http://concourt.am/):

Ելնելով վերոնշյալից խնդրում եմ Ձեզ առաջնորդվել ՀՀ Սահմանադրության 3-րդ, 6-րդ հոդվածների և ՀՀ Սահմանադրական դատարանի սույն ՈՐՈՇՄԱՆ 6-րդ կետի պահանջներով (որն ուժի մեջ է մտել հրապարկման պահից, տես Որոշման 7-րդ կետ), որպես անմիջական գործող նորմեր, ձեռնպահ մնալ նրանում նշված հոդվածների պահանջները կիրառելուց՝առանց իմ համաձայնության կամ կամքին հակառակ:

Իսկ հայեցողական լիազորություններից օգտվելուց առաջ, խնդրում եմ Ձեզ առաջնորդվել բացառապես ՀՀ սահմանադրության 3-րդ հոդվածով ամրագրված մարդու և քաղաքացու հիմնական իրավունքների ու ազատությունների պաշտպանության անհրաժեշտությամբ, նրանց իրավահավասարության, վարչարարության իրականացման համաչափության և կամայականության արգելքի սկզբունքներով, ձեռնպահ մնալ իմ, որպես Կազմակերպության/ընկերության աշխատողի, աշխատավարձից կուտակային կենսաթոշակի պարտադիր վճարումներ հաշվարկելուց և փոխանցելուց, քանի դեռ չունեք իմ գրավոր համաձայնությունը դրա վերաբերյալ:

Հարգանքով՝
անուն, ազգանուն
ստորագրություն

Հ.Գ. Սույն դիմումս հաշվի չառնելու դեպքում, օգտվելու եմ դատական պաշտպանության իմ իրավունքից, որը երաշխավորվում է ՀՀ սահմանադրությամբ:

Ցանկանում ենք հիշեցնել նաև ՍԴ նախագահ Գագիկ Հարությունյանիհայտարարությունը, ըստ որի «Կուտակային կենսաթոշակների մասին» ՀՀ օրենքի բոլոր կետերը մինչև սեպտեմբերի 30-ը գործում են: Իսկ դա նշանակում է, որ մուծումները պետք է կատարվեն: