ԱՄՆ-ն վերջերս ավելի քան կրկնապատկել է իր զորքերի թիվը Սիրիայում: Այս մասին հաղորդել է Պենտագոնի խոսնակ Պատրիկ Ռայդերը։
«Մոտ 2000 ամերիկացի զինծառայող Սիրիայում է», – ասել է նա ԱՄՆ պաշտպանության նախարարությունում կայացած ճեպազրույցում։
Նախկինում հաղորդվում էր, որ Սիրիայում մոտ 900 ամերիկացի զինծառայող է տեղակայված։ Ռայդերը հայտնել է, որ սա Սիրիայում պաշտոնապես տեղակայված զորքերի թիվն է։
Ըստ Պենտագոնի խոսնակի՝ զորքերի թվի աճը որոշ ժամանակ շարունակվում է, դրանք այնտեղ են «առնվազն մի քանի ամիս»:
Նա ընդգծել է, որ լրացուցիչ ուժերն աջակցում են «Իսլամական պետություն» ահաբեկչական խմբավորման դեմ պայքարի առաքելությանը և կապ չունեն Սիրիայում վերջին իրադարձությունների հետ։
Պենտագոնի խոսնակը բացատրել է, որ 900 հիմնական ամերիկացի զինվորականները գտնվում են երկրում 9-12 ամիս տևողությամբ՝ պաշտոնական հանձնարարություններով, ևս 1100 զինվորական՝ ժամանակավոր հիմունքներով՝ 30-90 օր՝ «փոխվող առաքելության կարիքները բավարարելու համար»: Ընդ որում, լրացուցիչ զինվորականների մեծ մասը հատուկ ջոկատայիններ են։
Հարցին, թե ինչու պաշտպանության նախարարությունը նախկինում չէր հրապարակել թարմացված թվերը, Ռայդերն ասել է, որ ինքը դրանց մասին իմացել է միայն դեկտեմբերի 19-ին, և մեջբերել է «դիվանագիտական և օպերատիվ անվտանգության զգայունությունը»:
.gif)
