ՔՊ խմբակցությունը հանդիպել է Անահիտ Ավանեսյանի հետ․ ինչ է քննարկվել

Այսօր Ազգային ժողովում «Քաղաքացիական պայմանագիր» խմբակցությունը հանդիպել է Առողջապահության նախարար Անահիտ Ավանեսյանի հետ: Այս մասին տեղեկացնում է խմբակցության ղեկավար Հայկ Կոնջորյանը:

Քննարկվել են առողջության համապարփակ ապահովագրության ներդրման վերաբերյալ հարցեր:

Ավելի վաղ «Ժողովուրդ» օրաթերթը գրել էր. ««Քաղաքացիական պայմանագիր» խմբակցության պատգամավորներն այսօր առողջապահության նախարար Անահիտ Ավանեսյանին կանչել են ԱԺ՝ փակ հանդիպում ունենալու:

«Ժողովուրդ» օրաթերթը տեղեկացավ, որ օրակարգում մի քանի անգամ հետաձգված ու այդպես էլ անորոշ մնացած «Առողջության համապարփակ ապահովագրության» ծրագիրն է լինելու:

Առողջության համապարփակ ապահովագրությունը պետք է ներդրվեր դեռեւս 2023 թվականին, ապա 2024 թվականի հուլիսին, հետո՝ 2025 թվականի հունվարի մեկից, բայց այդպես էլ մնաց օդում առկախ:

Ֆինանսների նախարար Վահե Հովհաննիսյանը ԱԺ-ում 2025 թվականի պետական բյուջեի նախագծի քննարկման ժամանակ հայտարարել էր, թե 2025-ի բյուջեով Առողջության համապարփակ ապահովագրության համար գումար նախատեսված չէ:

Այսօր ԱԺ-ում ՔՊ-ն Անահիտ Ավանեսյանի հետ կրկին կքննարկի նրա ձախողած նախագիծը:

Ակնհայտ է, որ առողջապահության հարցերի մշտական հանձնաժողովի նախագահի պաշտոնում հատկապես Արսեն Թորոսյանի նշանակվելուց հետո Անահիտ Ավանեսյանին լավ օրեր չեն սպասվում»։

Ավելի ուշ Ավանեսյանը տեսանյութ է հրապարակել, որին կից գրել է․ «Ապահովագրության փաթեթը ձեռքիս՝ շտապում եմ Ազգային ժողով՝ ՔՊ խմբակցության հետ քննարկման»։