Պակիստանի հարավ-արևմուտքում գտնվող Բելուջիստանի նահանգի Հարնայի շրջանում տեղի ունեցած պայթյունի հետևանքով զոհվել է առնվազն 11 բանվոր, ևս 6-ը վիրավորվել է։ Այս մասին հաղորդում է Geo TV-ն՝ վկայակոչելով Հարնայի իշխանություններին։
Պայթյունը տեղի է ունեցել բանվորներին ածխահանքեր տեղափոխող մեքենայի մոտ:
Բելուջիստանի կառավարությունը հրամայել է հետաքննել տեղի ունեցած պայթյունը։ Տեղեկություններ կան, որ ինքնաշեն պայթուցիկը տեղադրված է եղել ճանապարհի եզրին, և այն գործի է դրվել հեռակառավարվող սարքով։
Վերջին շրջանում բազմաթիվ ռումբերի պայթյուններ են գրանցվել Հարնայի Շահրագի շրջանում, որտեղ գտնվում են ածխի հանքերը։
Պակիստանի նախագահ Ասիֆ Ալի Զարդարին և վարչապետ Շեհբազ Շարիֆը խստորեն դատապարտել են տեղի ունեցած պայթյունը՝ խորը վիշտ հայտնելով մարդկային կյանքերի կորստի կապակցությամբ։
.gif)
