ՏԵՍԱՆՅՈՒԹ․Դեպքեր կան, երբ մանկապարտեզները երեխաների ծնողներից անկողնային սպիտակեղեն են ուզում, պետք է որոշենք՝ գույքը մինչև որ կետն ենք ապահովելու. Փաշինյան

Դեպքեր կան, երբ մանկապարտեզները երեխաների ծնողներից, օրինակ, անկողնային սպիտակեղեն են ուզում, այստեղ պետք է մեր քաղաքականությունը որոշենք, թե գույքը մինչև որ կետն ենք նկատի ունենում ապահովել. այս մասին կառավարության նիստի ժամանակ ասաց ՀՀ վարչապետ Նիկոլ Փաշինյանը:

Նա հարց բարձրացրեց, արդյոք աշխատանքները պլանավորում են այնպես, որ մանկապարտեզների գույքային հատվածներն էլ ապահովենք, չէ՞:

ԿԳՄՍ նախարար Ժաննա Անդրեասյանը նշեց, որ չզեկուցվող հարցերի շարքում նման նախագիծ հաստատեցին, որով անհրաժեշտ հատկացումներն են արել այն մրցույթների ու մատակարարումների համար, որոնք նախորդ տարի չէին ավարտվել և կարիք կար այդ հատկացումների, որ ամբողջական գույքային հագեցվածությունը ապահովվի:

Վարչապետը նշեց, որ այստեղ պետք է կառավարության քաղաքականությունը հստակեցվի: «Տեղեր կան, որ ծնողներն իրենք են ասում, որ մեր երեխաների համար մենք ինքներս ենք սպիտակեղեն բերում անկողնային: Այստեղ մենք մեր քաղաքականությունը պետք է որոշենք, ստանդարտ դնենք և ասենք, որ սա է, որովհետև չափորոշիչը մենք ենք որոշում»,- ասաց նա:

Անդրեասյանն էլ նշեց, որ առանձին գույքի ցանկի հրաման կա, և որ Փաշինյանի նշած պարագաները ներառված են այդ ցանկի մեջ:

«Մենք այս որոշումներով այդ հատկացումներն ենք անում, այսինքն անկողնային այդ սպիտակեղենը, անհրաժեշտ սպասքն առնվազն գործարկման պահին պետք է տրամադրել, իսկ հետո արդեն ժամանակի ընթացքում դրա փոխարինումը պետք է լինի հաստատության պահպանման ծախսերի մի մասը: Բոլորս հասկանում ենք, որ դրանք ավելի արագամաշ պարագաներ են և կարիք են ունենալու ավելի հաճախ փոխվելու, և սա պետք է ներառվի պահպանման ծախսերի մեջ հետագա շահագործման ընթացքում»,- ասաց Անդրեասյանը:

Մանրամասները՝ տեսանյութում։