ԸՆԴԳՐԿՎԵԼ Է ԵՎՐԱՍԻԱԿԱՆ ՀԵՔԻԱԹՆԵՐԻ ԺՈՂՈՎԱԾՈՒՈՒՄ

Մոսկվայի պետական լեզվաբանական համալսարանում տեղի է ունեցել «Քարե հսկաների լեգենդները» եվրասիական հեքիաթների ժողովածուի շնորհանդեսը։

Գրքում ներկայացված է ԱՊՀ երկրների ժողովուրդների մեկական հեքիաթ` ինչպես ռուսերենով, այնպես էլ տվյալ ժողովրդի մայրենի լեզվով։ Թարգմանությունները կատարվել են լեզվաբանական համալսարանի դասախոսների կողմից, եւ ժողովածուի բոլոր հեքիաթները ունեն թեմատիկ ընդհանրություն` լեռները։

Շնորհանդեսի ժամանակ ունեցած բացման խոսքում համալսարանի միջազգային համագործակցության նախագծային գրասենյակի տնօրեն Օլգա Եգորովան նշեց, որ հենց լեռներն են պահպանում ազգային արժեքները, հենց լեռներում է, որ մարդը գտնում է բոլոր հարցերի պատասխանները, եւ իզուր չէ, որ ժողովուրդները լեռներին են վերագրել լեգենդները։ «Թարգմանությունն այն տարածությունն է, որ միացնում է ազգերին։ Իսկ բոլոր ազգերի հեքիաթներում էլ բարին հաղթում է չարին։ Ու քանի որ այսօրվա երեխաները վաղվա հասարակությունն են, շատ կարեւոր է, թե ինչ է մատուցվում նրանց։ Հույս ունենք, որ ծրագիրը շարունակական բնույթ կկրի»,-նշել է բանախոսը։

Հայկական ժողովրդական հեքիաթներից ժողովածուում ընդգրկվել է «Անահիտ»-ը` Մոսկվայի պետական լեզվաբանական համալսարանի հայոց լեզվի ու մշակույթի կենտրոնի թարգմանությամբ։

Կենտրոնի տնօրեն Արմինե Մարտիրոսյանը, բարձր գնահատելով նախաձեռնության արդյունավետությունը, նշել է, որ խնդիր էր դրված ներկայացնելու ԱՊՀ երկրների մշակույթը նոր ժամանակներում։ «Թարգմանության մեջ դժվարություն ներկայացնողը հիմնականում դարձվածքներն ու ժողովրդին հատուկ բարբառային արտահայտությունների իմաստային նրբություններն են։ Բայց ուրախ եմ, որ հենց «Անահիտ»-ն էր ընտրված, որովհետեւ այն մեծ դաստիարակչական ուժ ունի եւ լավագույնս բնութագրում է հայ ժողովրդին»,- ասել է նա` ընդգծելով նախագծի շարունակականության կարեւորությունը։ Գիրքը լույս է տեսել հազար տպաքանակով։

Նշենք, որ ինչպես այլ ժողովուրդների, այնպես էլ հայերի հեքիաթներում մեծ տեղ են զբաղեցնում հրաշապատում հեքիաթները։ Պատումի սկզբում հրաշքի արտացոլման առարկաներ են հանդիսանում ամենից առաջ բնության ուժերը, որոնք հետագա զարգացման ընթացքում զանազան ժողովուրդների մոտ երեւան են գալիս ամենաբազմազան ու խայտաբղետ անձնավորումներով։

ԱՆՆԱ ՍՐԱՊԻՈՆՅԱՆ

ՊԱՏՐԻԱՐՔԱՐԱՆԸ ՄԵՂԱԴՐԵԼ Է

Երուսաղեմի Հայոց պատրիարքարանը մեղադրել է Իսրայելի իշխանություններին կրոնական կազմակերպության դեմ «անարդար, նպատակային եւ կեղտոտ հարկեր» գանձելու համար, ինչն ուղղված է եկեղեցու ներկայությունը Սուրբ Երկրում նվազեցնելուն։ Երուսաղեմի հայոց պատրիարքարանի X-ի էջում ասվում է, որ Երուսաղեմի քաղաքապետարանը ձգտում է բռնագրավել դարեր շարունակ իրեն պատկանող գույքը եւ այն աճուրդի հանել՝ 1994 թվականից ի վեր իբր գոյացած համայնքային պարտքերը հավաքելու համար։

«Եթե, Աստված մի արասցե, պատրիարքարանի միջնորդությունը մերժվի, Երուսաղեմի քաղաքապետարանը կալանք կդնի Պատրիարքարանին պատկանող անշարժ գույքի վրա եւ այն աճուրդի կհանվի՝ ենթադրյալ վիճելի պարտքերը վերականգնելու համար, որոնք երբեք չեն ապացուցվել դատական կարգով»,- ասվում է Երուսաղեմի հայոց պատրիարքարանի տարածած հաղորդագրության մեջ։

ԲՐԵՆԴԸ ՎԱՏ ՎԻՃԱԿՈՒՄ Է

Nike-ը անկում է ապրում. Վաճառքները նվազում են, բաժնետոմսերը կորցրել են իրենց արժեքի ավելի քան մեկ քառորդն անցած տարվա ընթացքում, եւ նրա նոր գործադիր տնօրենը օգնության կարիք ունի մարզական ընկերության վերակենդանացման համար: Օգնության է հասել Քիմ Քարդաշյանը։ Nike-ը համագործակցում է Քարդաշյանի հետ՝ ստեղծելու նոր ապրանքանիշ, որը կոչվում է «NikeSkims»: Այս մասին երեքշաբթի օրը համատեղ հայտարարել են ընկերությունը եւ նորաձեւության մագնատը։ Հավաքածուն, որը հիմնված է նրա հանրահայտ ձեւի հագուստի շարքի վրա, «կփոխի ֆիթնեսի եւ ակտիվ հագուստի համաշխարհային արդյունաբերությունը՝ դասի լավագույն նորամուծություններով բոլոր կին մարզիկների համար», ասվում է մամուլի հաղորդագրության մեջ:

Ապրանքանիշի դեբյուտը ԱՄՆ-ում այս տարվա գարնանը կանցնի առցանց եւ «ընտրված մանրածախ վայրերում», իսկ համաշխարհային մեկնարկը նախատեսվում է 2026 թվականին:

Նոր հավաքածուն առաջինն է Nike-ի համար, որը նախկինում չի համագործակցել արտաքին ընկերության հետ՝ նոր ապրանքանիշ ստեղծելու համար, փոխարենը հույսը դնում է ձեռքբերումների վրա կամ վարձում է հայտնի մարզիկների (օրինակ՝ Մայքլ Ջորդանը)

«Ավելին, քան համագործակցությունը, նոր ապրանքանիշը նոր ստանդարտ կսահմանի ֆիթնեսի եւ ակտիվ հագուստի համաշխարհային ոլորտում՝ մարզչական հագուստի, կոշիկի եւ աքսեսուարների լայն գծով»:  Նոր ապրանքանիշը կօգնի Nike-ին ավելի արդիական դառնալ ակտիվ հագուստի կատեգորիայում՝ օգնելով նրան մրցակցել Lululemon-ի եւ Alo-ի հետ, որտեղ «նա հետ է մնում եւ երկրորդ ջութակի դերում է», – ասում է մանրածախ առեւտրի վերլուծաբան եւ GlobalData Retail-ի գործադիր տնօրեն Նիլ Սաունդերսը:

Amazon-Ի ՍԵՓԱԿԱՆԱՏԵՐԸ ԿԱԶԱՏԱԶՐԿՎԻ՞

Առցանց հարթակների ձեռներեցներին, այդ թվում՝ Amazon-ի սեփականատեր Ջեֆ Բեզոսին, ըստ Մեծ Բրիտանիայում նոր իրավական կարգավորումների, սպառնում է մինչեւ երկու տարվա ազատազրկում, եթե նրանք դանակներ վաճառեն մինչեւ 18 տարեկան երեխաներին:  Միացյալ Թագավորության Ներքին գործերի նախարար Իվետ Կուպերը բարձրացնում է անչափահասներին դանակներ վաճառելու համար նախատեսված առավելագույն պատիժը վեց ամսից մինչեւ երկու տարի՝ ներմուծելով օրենքներ, ըստ որոնց, պատիժը կկիրառվի վաճառքն իրականացնող անհատի կամ ընկերության գործադիր տնօրենի նկատմամբ: Օրենքները կվերաբերեն ինչպես խոհանոցային դանակների վաճառքին, այնպես էլ արգելված զենքերին, ինչպիսիք են «զոմբի» դանակները: Օրենսդրական փոփոխություններին նախորդել է 2024 թ. հուլիսին Սաութփորթում պարի դասընթացի ժամանակ երեք աղջիկների սպանությունը 17-ամյա Ակսել Ռուդակուբանանի կողմից, որը դանակը գնել էր Amazon-ից։ Երիտասարդ մարդասպանը կարողացել էր շրջանցել առցանց խանութի երկփուլ անձը հաստատող ստուգումները՝ օգտագործելով ծրագրակազմ, որը կոդավորում է անձնական տվյալները եւ քողարկում օգտագործվող ինտերնետային հասցեն: