Լուսանկարն արվել է Էրեբունի վարչական շրջանում

Փաստորեն շունն ու կատուն հին ավանդույթներին չեն հետեւում. նրանք հաշտ ու համերաշխ՝ պառկել են արեւի ճառագայթների տակ՝ կանգառի նստարանին։

ՍՈՑԻԱԼԱԿԱՆ

ՀԱՐՑ, Խնդրում եմ ասեք՝ որ դեպքում է մերժվում անձին  կենսաթոշակի նշանակումը։

Անահիտ Խաչատրյան (63 տարեկան)

ՊԱՏԱՍԽԱՆ. Ա. Խաչատրյանի հարցին ի պատասխան տեղեկացնում ենք, որ կենսաթոշակի նշանակումը մերժվում է, եթե՝

անձը չունի կենսաթոշակի իրավունք,

կենսաթոշակի իրավունք ունեցող անձը, ըստ Հայաuտանի Հանրապետության բնակչության պետական ռեգիստրում առկա տվյալների, հաշվառված չէ ՀՀ-ում բնակության վայրի հասցեով,

ներկայացված փաստաթղթերը եւ պետական կենսաթոշակային համակարգի տվյալների շտեմարանի տվյալները բավարար չեն անձին կենսաթոշակ նշանակելու համար:

ՀՀ աշխատանքի եւ սոցիալական հարցերի նախարարություն

«ԺՈՂՈՎՈՒՐԴ». Հայտնում ենք, որ օտարերկրյա քաղաքացին կամ քաղաքացիություն չունեցող անձը կենսաթոշակի եւ կենսաթոշակ ստանալու իրավունք ունի Հայաստանի Հանրապետությունում բնակվելու իրավունք ունենալու ժամանակահատվածում: Հայաստանի Հանրապետությունում փախստականի կարգավիճակ չունեցող օտարերկրյա քաղաքացին կենսաթոշակի իրավունք ունի, եթե նա կենսաթոշակ չի ստանում այն պետությունից, որի քաղաքացին է:

ՀՈԳԵՎՈՐ

ՀԱՐՑ. Արդեն շուրջ մեկ տարի է, ինչ աշխատում եմ որպես զբոսավար` պատմելով Հայաստանի մասին օտարերկրացիներին: Վերջերս իտալացի մի զբոսաշրջիկ ասաց, թե կարդացել էր, որ եկեղեցական հագուստի գլխածածկի եռանկյունաձեւ եւ բարձր լինելը խորհրդանշում է Արարատը: Արդյո՞ք դա այդպես է:

Անիտա Սիմոնյան (41 տարեկան)

ՊԱՏԱՍԽԱՆ. Հայտնում ենք, որ խոսքը վեղարի մասին է: Հանդերձանքի այդ պարագայի հորինվածքը նմանեցվել է եկեղեցու գմբեթին, որն էլ իր հերթին ունի դեպի կատարելության ձգտման խորհուրդ: Մենք գիտենք, որ եկեղեցու գմբեթները բազմանիստ են եւ կլոր, բայց այն ուղիղները, որ դուրս են գալիս այդ կետերից, հատվում են մեկ կետում, որն էլ խորհրդաբար համարվում է կատարելության կետը: Հենց այդտեղ է դրված եկեղեցու խաչը: Ուստի հոգեւորականի վեղարի հորինվածքը եկեղեցու գմբեթի նմանությունն ունի, այլ ոչ թե Արարատի, որը ի դեպ, երկու գագաթ ունի:

Օրհնությամբ` Տեր Շմավոն քահանա Ղեւոնդյան

«ԺՈՂՈՎՈՒՐԴ».  Հայ Առաքելական եկեղեցու հովվապետի հանդերձանքի ձեւավորման, ստեղծման եւ զարգացման գործընթացը Հայաստանում սկսվել է քրիստոնեության ընդունումից անմիջապես հետո: Այն դարերի ընթացքում, ըստ կանոնակարգի, զարգանալով եւ համալրվելով կատարելագործվել, ձեռք է բերել բազմաշերտ կառուցվածք եւ շքեղ հարդարանք: Իր արտաքին տեսքով այն խիստ պատկառազդու է, օժտված հնօրյա խորհրդաբանությամբ: Հայոց եկեղեցու նվիրապետական կառույցում կաթողիկոսական հանդերձանքն այն կրողի գրաված դիրքի հիմնական ցուցիչն է, նրա սոցիալական կարգավիճակի արտահայտիչը: Որպես Հիսուսի փոխանորդ, Սուրբ Սեղանի առջեւ ծառայող հովվապետի ծիսական հանդերձանքը ներկայացնում է նաեւ հովվապետի համալրված հոգեւոր վիճակը: