Երեկ ԱԺ-ում «Բնապահպանության շրջակա միջավայրի վրա ազդեցության փորձաքննության մասին» նախագծի քննարկումն անցավ առանց հիմնական զեկուցողի` բնապահպանության նախարարի ներկայացուցչի, ինչն առաջացրեց պատգամավորների զայրույթը: Բացի անհարգալի վերաբերմունքից, սա նաեւ ԱԺ կանոնակարգ օրենքի կոպիտ խախտում է: Այս կապակցությամբ մեկնաբանություններ խնդրեցինք ԱԺ պատգամավորներից:
ԱՐՄԵՆ ՄԱՐՏԻՐՈՍՅԱՆ
-Պարո՛ն Մարտիրոսյան, վիրավորանք եւ ապտակ համարեցիք կառավարության ներկայացուցչի պահվածքը:
-Ամբողջ կառավարության, որովհետեւ այստեղ (ԱԺ) կառավարությունը ներկայանում է ոչ թե առանձին դեմքերով, այլ որպես կառավարություն:
-Տեղյա՞կ եք` ինչ պատճառով չէր եկել, եւ հետամո՞ւտ եք լինելու, որ կառավարությունը ներողություն խնդրի ԱԺ-ից:
-Բացարձակ, ինչի՞ն հետամուտ լինեմ, երբ ամեն ինչ պարզ է ի սկզբանե:
-Ի՞նչն է պարզ, որ կառավարությունն արհամարհո՞ւմ է ԱԺ-ն:
-Բնականաբար, սա հենց դա էլ նշանակում է: Օրենքը սղըցնում են, հերիք չէ, հասարակական կազմակերպությունների գլխի տակ փափուկ բարձ դնելով, որ օրենքի հետ կապված քննարկում են անում, բերում խորհրդարան, նաեւ ընթացակարգերը չեն պահպանվում:
-Գուցե այլ կարեւոր խնդիրներո՞վ են զբաղված:
-Իրենք շատ կարեւոր խնդիրներով են զբաղված, դրա արդյունքում արտագաղթն անընդհատ մեծանում է, էնքան կարեւոր խնդիրներով են զբաղված, շատ կարեւոր, շարիկ գլորելու բյուջե են ընդունում, ո՞րն ասեմ: Էն ժամանակ գոնե մի փոքր ավելի զուսպ էին, հիմա նույնիսկ ներկայացուցիչ չեն ուղարկում կարեւորագույն օրենքի քննարկման ժամանակ:
-Գուցե իրե՞նք էլ տեսնում են, որ ԱԺ-ում պատգամավոր չկա:
-Ո՛չ, հենց էսօր, էս արտահերթի պայմաններում պատգամավոր ավելի շատ կար, քան եղել է նույնիսկ հերթական քառօրյաների ընթացքում: Այնպես որ, դա արդարացման խնդիր չէ: Եւ իրենք չէ, որ ընտրել են պատգամավորներին, այլ պատգամավորներն են, որ ձեւավորել են կառավարություն:
-Լավ, իսկ ինչո՞ւ է կառավարությունը հիմա դեմարշ անում:
-Չեմ կարող ասել` խորհրդարանական մեծամասնությանն է առաջին հերթին սա ուղղված, ու նա էլ թող առաջին հերթին մտածի` ինքն ինչպիսի կառավարություն է ձեւավորել եւ ինչպիսի հարաբերությունների մեջ է այդ կառավարության հետ:
ԱՐԾՎԻԿ ՄԻՆԱՍՅԱՆ
-Պարո՛ն Մինասյան, դեռ նախորդ տարի ՀՅԴ խմբակցության ղեկավարն էր ասում, որ կառավարությունը վատ սովորություն է դարձրել հում օրենքներ բերել-սղացնել: Հիմա, մի օրենքի հետ կապված, կառավարության ներկայացուցիչը չկա, առավոտյան 25 րոպե առաջ բերեցին մի մեծ փաթեթ: Կառավարության գործելաոճի մասին ի՞նչ կասեք: Եւ ինչո՞ւ են այդպես անում:
-Վատ: Իսկ թե ինչու են այդպես անում, իրենց հարցրե՛ք: Համենայնդեպս, օրենսդիր մարմնի նկատմամբ դա լավ վերաբերմունք չէ: Ամեն ինչ շատ պարզ է. այնքանով, որքանով ԱԺ վերաբերմունքն է կառավարության նկատմամբ՝ սկսած նրանից, որ պատասխանատվության կոնկրետ պայմաններ պետք է դնի, համանման վերաբերմունք էլ կառավարությունից է: Եւ ես կարծում եմ` քանի դեռ կառավարությունն ԱԺ-ին հաշվետու չէ ամբողջությամբ` յուրաքանչյուր նախարարի եւ գործունեության մասով, այսպիսի մոտեցումները շարունակվելու են:
ՆԱԻՐԱ ԶՈՀՐԱԲՅԱՆ
-Տիկի՛ն Զոհրաբյան, հիմնական զեկուցողի բացակայության պայմաններում բարձրացրիք նախագծի լեգիտիմության հարցը:
-Այո՛, ես խնդրեցի, որ մեզ տան պարզաբանում` քննարկվե՞լ է, ի վերջո, հանձնաժողովում, թե՞ չէ, որովհետեւ մենք վաղը քննարկելու ենք, եւ կառաջանար լեգիտիմության խնդիր: Այո՛, այլ հարց է, որ հանձնաժողովը կարող է չքննարկել, եթե բերվում է արտահերթ, բայց խնդիրն այն է, որ եթե Խաչիկ Հարությունյանը հանդես է գալիս որպես հարակից զեկուցող, նա դրա իրավասությունը չուներ այն պարզ պատճառով, որ հանձնաժողովը չէր քննարկել: Ի պատիվ իրեն` նա ընդունեց եւ ասաց, որ, այո՛, հանձնաժողովը չի քննարկել, եւ ինքն էլ չգիտի, թե ինչու են իրեն դրել հարակից զեկուցող:
-Ընդդիմության կողմից սա գնահատվեց իբրեւ խայտառակություն, սաբոտաժ: Որոշ ընդդիմադիրներ ասում են, որ սա պետական կառավարման համակարգի դեգրադացիա է…
-Չէ՛, ես էստեղ տեսնում եմ տեխնիկական հարց, զուտ անփութության խնդիր, ես չեմ ուզում հեռուն գնացող եզրակացություններ անել: Կարծում եմ, որ այստեղ կա ԱԺ-ի նկատմամբ տարրական հարգանքի խնդիր:
-Իսկ կարելի՞ է համարել, ասենք, որ դա շարիկ գլորելու արդյունք է:
-Ամեն դեպքում, հարցն այն է, որ այս կարեւոր նախագիծը քննարկվում է առանց կառավարության ներկայացուցչի մասնակցության: Ի վերջո, կառավարության ներկայացուցիչը պիտի լինի՞, որ լսի իրենց բերած նախագծի վերաբերյալ գնահատականները: Առհասարակ, կառավարությունը պիտի հարգանք ունենա իր իսկ բերած նախագծերի հանդեպ, իր իսկ սահմանած օրակարգի հանդեպ: Եւ վաղուց անցել են այն ժամանակները, որ կառավարությունն ԱԺ-ին դիտի որպես կոճակ սեղմող դակիչ:
ԳԱԼՈՒՍՏ ՍԱՀԱԿՅԱՆ
-Պարո՛ն Սահակյան, կառավարության ներկայացուցիչները մի նախագծի քննարկման ժամանակ բացակայում էր, եւ անգամ նախագծի լեգիտիմության հարց դրվեց:
-Ներկայացուցիչները չէ, ներկայացուցիչը, իսկ որեւէ օրինագծի լեգիտիմություն չի կարող լինել: Իհարկե, շատ պատշաճ էր, որ կառավարության ներկայացուցիչը լիներ:
-Բայց չկար:
(Գալուստ Սահակյանը լռեց)
-Մեկն էլ գալիս է, շարիկ է գլորում:
-Ստիպված եմ ամեն մեկիդ ձեռքը շարիկ տամ, որ էդ գլորելու պատմությունն անընդհատ չշահարկեն:
.gif)
