Գյուղացիները կազատվեն հողի հարկից

ՀՀ փոխվարչապետի պաշտոնակատար Արմեն Գևորգյանը այսօրվա կառավարության նիստի ժամանակ հայտարարեց, որ այս տարի ցրտահարությունից տուժած գյուղացիներն օժանդակության կարգով կազատվեն հողի հարկից, իսկ ջրի վարձը կվճարեն 50%-ով:

Ա.Գևորգյանը նշեց, որ ցուցակներ կկազմվեն, որտեղ նշված կլինեն, թե ինչ օժանդակություն է ցույց տրվելու տուժած կարիքավորներին:

Բացի այդ մարզային և տեղական իշխանությունները պետք է կազմեն շահառուների ցուցակները, որոնք տեղադրվելու են մարզպետարանների կայքերում, իսկ ջրի օժանդակության ծրագրի շահառուների ցուցակը հասանելի կլինի Ջրպետկոմի կայքում:

2014թ. վարձավճարները փոխհատուցելու նպատակով ՀՀ ՏԿՆ ջրտնտպետկոմին հատկացվել է 487 մլն դրամ: Ակնկալվում է, որ պետական աջակցության շնորհիվ կստեղծվեն համայնքների վնասված հողերի հետագա արդյունավետ օգտագործման, գյուղմթերքների արտադրության ծավալի և գյուղացիական տնտեսությունների եկամտի ավելացման նպաստավոր պայմաններ:

ՀՀ աշխատանքի և սոցիալական հարցերի նախարարի պաշտոնակատար Արտեմ Ասատրյանը տեղեկացրեց, որ անցած տարի կարկուտից տուժածներին սոցիալական գծով հատկացվել է 120 մլն դրամ:

Այս տարի նախատեսվել է տրամադրել 150-200 մլն դրամ աջակցություն ցուցաբերել:

Սերմացու ձեռք բերելու համար ՀՀ գյուղատնտեսության նախարարին թույլատրվել է «Սերմերի գործակալություն» ՊՈԱԿ-ի նպատակային հաշվեհամարից օգտագործել 85 մլն դրամ:

Նույն ՊՈԱԿ-ի միջոցով սերմացուն տրամադրվելու է Արագածոտնի, Արարատի, Արմավիրի, Լոռու, Վայոց ձորի և Տավուշի մարզպետարաններին, որոնք 10-օրյա ժամկետում համայնքների ղեկավարների միջոցով սերմացուն ըստ բաշխացուցակի  հասցնելու են հողօգտագործողին:

Սոնա Դավթյան