ՏԵՍԱՆՅՈՒԹ․ «Տակը նյութ չկա»․ ինչ է սպասվում ԱԺ պատգամավոր Տարոն Մարգարյանին

ArmLur.am-ը զրուցել է ԱԺ պատգամավոր Տարոն Մարգարյանի փաստաբան Բենիկ Գալստյանի հետ:

Հիշեցնենք, որ Գլխավոր դատախազությունը դիմել է Ազգային ժողով՝ պատգամավորներ Հովիկ Աղազարյանի և Տարոն Մարգարյանի նկատմամբ քրեական հետապնդում սկսելու միջնորդագրով։ Ծավալուն միջնորդություններն արդեն տեղադրված են խորհրդարանի կայքում:

Դատախազությունը միջնորդագրում պնդում է, որ փաստական հիմքեր ունի իշխող ուժից անցած տարեվերջին հեռացված պատգամավոր Հովիկ Աղազարյանի նկատմամբ առանձնապես խոշոր չափերի կաշառք ստանալու և պաշտոնատար անձի նկատմամբ ունեցած իրական կամ ենթադրյալ ազդեցությունն օգտագործելու հոդվածներով քրեական հետապնդում հարուցելու համար:

Հիշեցնենք, որ «Ժողովուրդ» օրաթերթը գրել էր․ «Ինչպես «Ժողովուրդ» օրաթերթը տեղեկացրել էր, ՀՀ Դատախազությունը Ազգային ժողով է ուղարկել 60 էջանոց մի փաստաթուղթ, որով փորձում է պատգամավոր Տարոն Մարգարյանի նկատմամբ մեղադրանք առաջադրել: Մինչդեռ 2018-ի օգոստոսից քննվել է այդ գործը, որին ներգրավված են 9 անձինք: Անցած 7 տարիների ընթացքում այս դատական գործը վախճան չի ունեցել, հիմա դատախազությունը որոշել է նույն արարքը վերաորակավորել:

Ինչի մասին է խոսքը. Տարոն Մարգարյանին իրավապահները մեղադրում են, թե դպրոցների և մանկապարտեզի հարակից հողատարածքներից կտորներ է օտարել, որոնք չեն ծառայել ուսումնական նպատակների: Բայց ուշագրավն այն է, որ 2021 թ. դեկտեմբերին քննիչները, քննելով երկարամյա գործը, հրաժարվել են մի հանցակազմից, որը հիմա նորից են փորձում առաջ քաշել:

Իսկ հիմա ամենազավեշտալին: 2021թվականին, Նիկոլ Փաշինյանի կառավարության որոշմամբ, Երեւանի կենտրոնի Իսակով պողոտայի 13/12 հասցեի «Երևանի երաժշտական հ. 13 հատուկ դպրոց» ՊՈԱԿ-ին պատկանող տարածքը` 9446 քմ մակերեսով և 360 քմ մակերեսով կաթսայատան շինությունը վերցրել են դպրոցից ուղղակի վաճառքով՝ առանց աճուրդի, տրամադրել են «Արմենիա վայն գործարան» ընկերությանը, որը տարածքում բիզնես կենտրոն է կառուցվել: Այսինքն` դարձյալ դպրոցին հարակից տարածքը ուսումնական նպատակի չի ծառայել, բայց այս դեպքում որեւէ մեկը չի պատժվել, քանի որ իրավապահները հանցակազմ չեն տեսել:

Ստացվում է, որ արարքը, որն արել է Տարոն Մարգարյանը` որպես նախկին քաղաքապետ, հանցանք է համարում դատախազությունը, մտնում է ԱԺ՝ փողերի լվացման մեղադրանք առաջադրելու համար, իսկ երբ նույն արարքը կատարում է գործող Կառավարությունը, հանցանք չկա:
Ահա ընտրովի արդարադատության կոնկրետ, փաստարկված դրսևորում»:

Քնար Մանուկյան, Հովսեփ Հովսեփյան

Մանրամասները՝ տեսանյութում