Եվրոպայում և Կենտրոնական Ասիայում երեխաների շրջանում տուբերկուլյոզի դեպքերն ավելացել են

Աշխարհի ամենամահաբեր վարակիչ հիվանդության՝ տուբերկուլյոզի դեպքերը տարեկան կտրվածքով աճել են գրեթե 10 տոկոսով Եվրոպայի և Կենտրոնական Ասիայի երեխաների շրջանում, ասվում է միջազգային առողջապահական գործակալությունների նոր զեկույցում:

Համաձայն Հիվանդությունների կանխարգելման և վերահսկման եվրոպական կենտրոնի (ECDC) և Առողջապահության համաշխարհային կազմակերպության (ԱՀԿ) Եվրոպայի թիմի զեկույցի, տվյալները ցույց են տալիս, որ եվրոպական տարածաշրջանը դեռևս պայքարում է COVID-19 համաճարակի հետևանքների հետ:

Եվ դա տեղի է ունենում այն ժամանակ, երբ առողջապահության ոլորտի մասնագետները զգուշացնում են, որ համաշխարհային օգնության կրճատումները կարող են հանգեցնել տուբերկուլյոզի տարածման ամբողջ աշխարհում:

2024 թվականին եվրոպական տարածաշրջանում ավելի քան 172,000 մարդ կամ հիվանդացել է տուբերկուլյոզով կամ ունեցել է հիվանդության նախանշաններ:

Երեխաների թիվը նույնպես, ըստ երևույթին, աճում է, 2024 թվականին եվրոպական տարածաշրջանում 15 տարեկանից փոքր երեխաների մոտ 7500 տուբերկուլյոզի դեպք է գրանցվել, ինչը 9,6 տոկոսով ավելի է նախորդ տարվա համեմատ, ասվում է զեկույցում:

Այս դեպքերից ավելի քան 2400-ը գրանցվել է մինչև 5 տարեկան երեխաների մոտ:

Հետազոտությունները ցույց են տալիս, որ տուբերկուլյոզը շարունակում է տարածվել ամբողջ Եվրոպայում, և որ «անհապաղ» ջանքեր պետք է գործադրվեն՝ հիվանդությունը վերահսկելու համար, ասվում է զեկույցում:

Ինչու՞ է տուբերկուլյոզը այդքան դժվար վերացնել

Տուբերկուլյոզը առաջանում է բակտերիալ վարակի հետևանքով, որը հիմնականում ազդում է թոքերի վրա, բայց կարող է տարածվել նաև այլ օրգանների վրա: Վարակված մարդկանց մեծամասնության մոտ այդ հիվանդությունը չի զարգանում, բայց եթե զարգանա, դա կարող է վտանգավոր լինել՝ տարեկան մոտ 1,25 միլիոն մարդու մահվան պատճառ դառնալով:

Այն համընկնում է նաև առողջական այլ լուրջ խնդիրների հետ: Եվրոպական տարածաշրջանում նոր կամ վերակտիվացված տուբերկուլյոզով մարդկանց 15,4 տոկոսը ունի նաևՄԻԱՎ, ասվում է զեկույցում:

Տուբերկուլյոզը դժվար է կառավարել, այդ թվում՝ ախտորոշման ուշացուման, հիվանդների կողմից դեղորայքը ժամանակին չընդունելու և ճիշտ բուժումների անհասանելիության պատճառով:

Հիվանդները պետք է ամեն օր ընդունեն տուբերկուլյոզի դեմ դեղամիջոց մինչև վեց ամիս, որպեսզի այն արդյունավետ լինի:
Անցյալ շաբաթ ԱՀԿ-ն նախազգուշացրեց , որ համաշխարհային օգնության կրճատումն արդեն իսկ խաթարում է հիվանդության վերացման առաջընթացը 27 երկրներում, հիմնականում Աֆրիկայում, Հարավարևելյան Ասիայում և Արևմտյան Խաղաղ օվկիանոսում: Ինը երկրներում մարդիկ պայքարում են տուբերկուլյոզի դեմ դեղամիջոց ստանալու համար:

Տարածաշրջանում 2024 թվականին ամենաշատ դեպքերն գրանցվել են Ռուսաստանում, որին հաջորդում են Ուկրաինան, Ուզբեկստանը, Ղազախստանը, Թուրքիան և Ռումինիան։