ԼՈՒՐ ԿԱԴՐ

Լուսանկարը՝ պաշտոնական լրահոսից

Բնապահպանության եւ ընդերքի տեսչական մարմնի եւ ՆԳՆ ոստիկանության աշխատակիցները Վայոց ձորի մարզի Արենի համայնքում հայտնաբերել են քաղաքացու կողմից տան պայմաններում պահվող բեզոարյան այծ։ Պարզվել է, որ Աղավնաձոր բնակավայրի բնակիչ Վ.Օ.-ն իր տանը պահում է դաշտից հայտնաբերած բեզոարյան այծի 1 առանձնյակ։ Կենդանին առգրավվել եւ տեղափոխվել է ՀՀ գիտությունների ազգային ակադեմիայի կենդանաբանության եւ հիդրոէկոլոգիայի ազգային կենտրոն։ Կենդանական աշխարհին պատճառված վնասի չափը կազմել է 15.000.000 դրամ։

ՍՈՑԻԱԼԱԿԱՆ

ՀԱՐՑ.  Խնդրում եմ ասեք՝ ինչպես եւ ուր պետք է դիմի անձը ֆունկցիոնալության գնահատման համար։

Անահիտ Պողոսյան (64 տարեկան)

ՊԱՏԱՍԽԱՆ. Քաղաքացու հարցին ի պատասխան տեղեկացնում ենք, որ համաձայն կառավարության 2022 թ. հուլիսի 28-ի N 1180-Ն որոշման, հաշմանդամության գնահատման (անձի ֆունկցիոնալության գնահատման) համար անձը կամ նրա օրինական ներկայացուցիչը ֆունկցիոնալության գնահատման ուղեգրվելու համար դիմում է իրեն բժշկական օգնություն եւ սպասարկում իրականացնող կազմակերպությանը։

Հիվանդության կամ վնասվածքի հետեւանքով օրգանիզմի ֆունկցիաների կայուն խանգարման առկայության դեպքում համապատասխան բժշկական օգնություն կամ սպասարկում իրականացնող կազմակերպությունն անհրաժեշտ ախտորոշիչ, բուժական եւ վերականգնողական միջոցառումներ իրականացնելուց հետո, իսկ տեւական բուժում պահանջող հիվանդությունների ժամանակ` նաեւ բուժման ընթացքում, սակայն ոչ վաղ, քան բուժման սկզբից 3 ամիս հետո (բացառությամբ սույն կարգի 9-րդ գլխով սահմանված` անձի առողջական վիճակի վերականգնման հեռանկարի բացակայություն ունեցող հիվանդությունների ցանկի) անձին ուղեգրում է ֆունկցիոնալության գնահատման:

Ֆունկցիոնալության գնահատման ուղեգիրը համապատասխան բժշկական օգնություն կամ սպասարկում իրականացնող բժշկական կազմակերպության կողմից ձեւավորվում է էլեկտրոնային առողջապահության «Արմեդ» համակարգում։

Որից հետո՝ անձի ֆունկցիոնալության գնահատման համար դիմումը առցանց, փոստով, էլեկտրոնային փոստով կամ առձեռն ներկայացվում է Միասնական սոցիալական ծառայություն կամ ծառայության ցանկացած տարածքային կենտրոն։

Դիմումին ընթացք է տրվում կառավարության 2022թ. հուլիսի 28-ի N 1180-Ն եւ 2022թ. հուլիսի 28-ի N 1177-Ն  որոշումների համաձայն։

ՀՀ աշխատանքի եւ սոց. հարցերի նախարարություն

«ԺՈՂՈՎՈՒՐԴ». Նշենք, որ անձի Ֆունկցիոնալության գնահատման որոշումը եւ ծառայությունների անհատական ծրագիրը հաշմանդամություն ունեցող անձին տրամադրվում են որոշման կայացումից հետո՝ երեք աշխատանքային օրվա ընթացքում։

ՀՈԳԵՎՈՐ

ՀԱՐՑ. Հետաքրքիր է իմանալ, եթե չի կարելի երդվել, ապա ինչո՞ւ են զինվորները, բժիշկները, պետության նախագահը երդում տալիս, ինչո՞ւ են վկաները դատարանում երդվում։

Ալիսա Մանուկյան (43 տարեկան)

ՊԱՏԱՍԽԱՆ. Հայտնում ենք, որ զինվորը, որին վստահվել է հայրենիքի եւ ժողովրդի ապահովությունը, պարտավոր է հաստատել իր հավատարմությունը, որ կոչվում է դրոշի երդում՝ միաժամանակ կրելով պատասխանատվության հետեւանքները եւ այն պատիժը, որ կարող է լինել դավաճանության դեպքում։ Դա, անշուշտ, բարձրացնում է զինվորի զգոնությունը հայրենիքի եւ ազգի հանդեպ։ Բժիշկը, որին վստահվում է մարդու առողջությունը, պարտավոր է երդմամբ հաստատել, որ հոգ է տանելու, պատասխանատու է լինելու մարդկանց առողջության համար՝ միաժամանակ պատրաստ է կրելու այն պատիժը, որ կարող է լինել ոչ ճիշտ բուժման դեպքում։ Այդ երդումը զգոնության կոչ է բժշկի համար։ Երկրի նախագահը երդում է տալիս ժողովրդին, որ չի շեղվի օրենքի սահմաններից եւ իր պատասխանատու գործը բարեխղճությամբ կկատարի։ Երդման արարողություն է կատարվում նաեւ դատարաններում, որտեղ երդվյալ վկայի խոսքի հիման վրա երբեմն հնարավոր է կյանքի եւ մահվան հարցեր լուծվեն: Այդ պատճառով վկայի երդումը չափազանց կարեւոր եւ պատասխանատու է։ Քրիստոնյա երկրներում մեծ մասամբ երդվում են՝ ձեռքը դնելով Ս. Գրքի՝ Աստվածաշնչի վրա։

Օրհնությամբ՝ Տ. Նարեկ աբեղա Ավագյան

 «ԺՈՂՈՎՈՒՐԴ». Այս դեպքում երդումը պարզապես խոստման ու պարտավորության ստանձման իմաստ ունի: