Նիկոլ Փաշինյանը Գյումրի չգնաց, որ պարտությունն իրեն չվերագրեն․ ինչքան ձայն տվեցին ՔՊ-ին

ArmLur.am-ը տեղեկացավ, որ երեկ Գյումրիում տեղի ունեցած ընտրություններում «Քաղաքացիական պայմանագիր» կուսակցությանը գյումրեցիների 47․452 ընտրողներից միայն 17․183-ն է ձայն տվել։ Ստացվում է, որ քաղաքացիների կեսն անգամ Նիկոլ Փաշինյանի իշխանությանը Գյումրիում ձայն չի տվել։

ArmLur.am-ի տեղեկություններով՝ այս խայտառակ տվյալների մասին վաղուց տեղեկացված է եղել Նիկոլ Փաշինյանը, ինչի համար ո՛չ մասնակցեց քարոզարշավին և ո՛չ էլ ՔՊ-ի կազմակերպած վերջին եզրափակիչ հանրահավաքին։

Նշենք, որ Փաշինյանը ընդամենը մեկ անգամ գնաց Գյումրի, այն էլ ՏԻՄ ընտրությունների համար դրամահավաք կազմակերպելու համար, շրջեց Գյումրիում, զրուցեց գյումրեցիների հետ, հասկացավ նրանց տրամադրվածությունը, և այլևս չխառնվեց իրավիճակին, որ պարտության խարաններից մեկը ինքը չդառնա։

Հիշեցնենք, որ Նիկոլ Փաշինյանը Գյումրի այցելել էր մարտի 9-ին և հանդես եկել սուր ելույթով։

Նա ընտրությունների մասնակիցներից միայն նախկին քաղաքապետ, Կոմկուսի ցուցակը գլխավորող Վարդան Ղուկասյանի անունը տվեց: Սակայն, ընդգծեց, որ «Գյումրիի ընտրություններին մասնակցում է 300-350 միլիոն դոլարի ապօրինի ձեռք բերված գույք, որը սպասում է վերադարձի»՝ հայտարարելով, թե դրանք նախկին դեսպան Միքայել Մինասյանինը, Վարդան Ղուկասյանինը, երկրորդ և երրորդ նախագահներ Ռոբերտ Քոչարյանինն ու Սերժ Սարգսյանինն են:

Սոնա Գրիգորյան