Ադրբեջանի արտգործնախարար Ջեյհուն Բայրամովը և նրա ռուս գործընկեր Սերգեյ Լավրովը շնորհավորական նամակներ են փոխանակել երկու երկրների միջև դիվանագիտական հարաբերությունների հաստատման 33-ամյակի կապակցությամբ։
Իր նամակում ԱԳ նախարար Բայրամովը շնորհավորել է իր ռուս գործընկերոջը՝ բարձր գնահատելով վերջին տասնամյակների ընթացքում երկկողմ հարաբերությունների հաջող զարգացումը, հաղորդում է Ադրբեջանի ԱԳՆ-ն։
Նա ընդգծել է, որ երկու ժողովուրդների միջև կապերը, որոնք հիմնված են ընդհանուր պատմական արժեքների, փոխադարձ հարգանքի և միմյանց շահերին նվիրվածության վրա, ռազմավարական գործընկերությունից վերածվել են դաշնակցային փոխգործակցության:
«Այսօր դաշնակցային համագործակցությունը, որը բնութագրվում է ինտենսիվ երկկողմ շփումներով, շարունակում է արդյունավետորեն ամրապնդվել»,- նշել է Բայրամովն իր նամակում։
Բայրամովը նաև բարձր է գնահատել երկու երկրների արտաքին քաղաքական գերատեսչությունների միջև շարունակական համագործակցությունը, որը նպաստում է նրանց դաշնակցային հարաբերությունների ամրապնդմանը:
«Համոզված եմ, որ ադրբեջանա-ռուսական հարաբերությունները կշարունակեն համակողմանիորեն խորանալ և հագեցած լինել նոր բովանդակությամբ՝ ի շահ մեր պետությունների և ժողովուրդների», – հավելել է Բայրամովը՝ եզրափակելով իր ուղերձը։
Անի Վարդանյան
.gif)
