Ապրիլի 11-ին ՀՀ առողջապահության նախարարությունում տեղի ունեցավ Արարատ բժշկական կենտրոնի հենքի վրա փետրվարի 25-ին անցկացված ցուցադրական զորավարժության արդյունքների ամփոփումը:
Ամփոփմանը ներկա էին ՀՀ պաշտպանության նախարարի պաշտոնակատար Սեյրան Օհանյանը, առողջապահության նախարարի պաշտոնակատար Դերենիկ Դումանյանը, ՀՀ գլխավոր ռազմական տեսուչ, գեներալ-գնդապետ Միքայել Հարությունյանը, բարձրաստիճան զինվորականներ, առողջապահության ոլորտի պատասխանատուներ:
ՀՀ առողջապահության նախարարի պաշտոնակատար Դերենիկ Դումանյանն իր խոսքում փաստեց, որ զորավարժության արդյունքում ամրապնդվել են բժշկական կենտրոնի անձնակազմի տեսական և գործնական գիտելիքները: Նա ընդգծեց նաև, որ բոլոր բուժհաստատությունները պետք է պատրաստ լինեն հնարավոր պատերազմական իրավիճակի դեպքում գործելու որպես զինվորական հոսպիտալներ և կատարել առաջադրված խնդիրները:
ՀՀ գլխավոր ռազմական տեսուչ, գեներալ-գնդապետ Միքայել Հարությունյանն էլ, մատնանշելով զորավարժության խնդիրներն ու առանձնահատկությունները և ընդհանուր առմամբ բավարար գնահատելով զորախաղի վերջնական արդյունքը, ընդգծեց, որ բժշկական կենտրոնն ունակ է սահմանված ժամկետում բացազատվելու որպես թիկունքային հոսպիտալ` գործելով ՊՆ ենթակայության ներքո: Միևնույն ժամանակ Միքայել Հարությունյանը վերհանեց զորավարժության ընթացքում արձանագրված բացթողումները:
Ողջունելով ներկաներին և շնորհակալություն հայտնելով զորախաղին ներգրավված անձնակազմին ակտիվ մասնակցության համար` պաշտպանության նախարարի պաշտոնակատար Սեյրան Օհանյանը փորձի փոխանակման տեսանկյունից կարևորեց նմանաբնույթ միջոցառումների անցկացումը և հավաստիացրեց, որ զորավարժության խնդիրները կատարվել են բարձր մակարդակով: Սեյրան Օհանյանը նաև նշեց, որ զորախաղի արդյունքում ձևավորվել է միասնական մոդել` առաջիկայում այլ բուժհաստատություններում կիրառելու համար:
Եզրափակելով ելույթը` Սեյրան Օհանյանը հույս հայտնեց, որ երկու գերատեսչությունների` առողջապահության և պաշտպանության նախարարությունների հետևողական աշխատանքի արդյունքում առաջիկայում կլուծվեն զորավարժության ընթացքում արձանագրված բոլոր բացթողումները: Այս առումով երկու ոլորտների պատասխանուների կողմից հնչեցին մի շարք առաջարկներ:
Հանդիպումը եզրափակվեց զորավարժությանը ներգրավված մասնակիցներին, պահեստազորի բուժծառության սպաներին պաշտպանության և առողջապահության նախարարների կողմից հերթական զիվորական կոչումներ և պատվոգրեր հանձնելու արարողությամբ:
Արարատ բժշկական կենտրոնի հենքի վրա փետրվարի 25-ին անցկացված ցուցադրական մարտավարամասնագիտական զորավարժության նպատակն էր ստուգել բուժհաստատության մարտական պատրաստականության տարբեր աստիճանների բերման պլանի իրատեսությունը` պատերազմական հնարավոր իրավիճակի դեպքում քաղաքացիական բուժհաստատությունները որպես զինվորական հոսպիտալներ բացազատելու և ՊՆ ենթակայությանը հանձնելու նպատակով:
.gif)
