ԱՄՆ Սենատի արտաքին հարաբերությունների հանձնաժողովը, Հայոց ցեղասպանության փաստը դատապարտող բանաձև ընդունելով, փորձ է անում փոխհատուցել Քեսաբի դեպքերին Միացյալ Նահանգների ցուցաբերած ոչ պատշաճ վերաբերմունքը: Armlur.am-ի հետ զրույցում այս մասին ասաց Ֆրանսիայում Արևմտյան Հայաստանի Ազգային խորհրդի նախագահ Արմենակ Աբրահամյանը:
«Սակայն այս բանաձևը Ցեղասպանությունը վերապրածների իրավունքների ճանաչման մասին փաստաթուղթ չէ: Մինչդեռ ավելի գերադասելի կլիներ, եթե բանաձևն այդպիսի բովադակության լիներ: Միաժամանակ, ավելի ու ավելի ակնհայտ է դառնում, որ Հայոց ցեղասպանության ճանաչման գործընթացը կեղծ է»,- ասաց ֆրանսահայ գործիչը:
Արմենակ Աբրահամյանի խոսքով, Սենատի ընդունած բանաձևից շոշափելի ակնկալիքներ չպետք է ունենալ:
«Այս ամենը ձևականություն է, որպեսզի հայությունը Քեսաբի իրադարձությունների համատեքստում հանգստություն պահպանի»,- ասաց նա:
Հիշեցնենք` սա առաջին դեպքն է վերջին 25 տարիների ընթացքում, երբ Սենատում նման փաստաթուղթ է ընդունվում։
Հիշեցնենք նաև, որ բանաձևն ընդունվել էր 12 կողմ, 5 դեմ ձայներով։
.gif)
