ՏԵՍԱՆՅՈՒԹ․ ՊՆ նախարար Սուրեն Պապիկյանը ոսկեզօծ ժամացույց է նվեր ստացել․ որքան արժե

Այսօր մամուլի դիտակետում հայտնված Պաշտպանության նախարար Սուրեն Պապիկյանը օրերս նշում էր ծննդյան տարեդարձը։ Հունվարի 21-ին Պապիկյանը մի շարք արժանիքների համար ստացել է թանկարժեք նվեր։

ArmLur.am-ը տեղեկացավ, որ Կոռուպցիայի կանխարգելման հանձնաժողով ներկայացրած «Հանրային պաշտոն զբաղեցնող անձի կամ հանրային ծառայողների նվերների հաշվառման ձեւաթղթի» համաձայն՝ Սուրեն Պապիկյանը թանկարժեք նվեր է ստացել և հանձնել է պետությանը։

Իսկ ով է նվիրողը և ինչ է նվիրել

Հակակոռուպցիոն կոմիտեի նախկին ժամանակավոր ղեկավար Էդիկ Հակոբյանը 170 հազար դրամ արժողությամբ ժամացույց է նվիրել Պապիկյանին։ Նվերը ստանալու հանգամանքը եղել է «Օրինականության և իրավակարգի ամրապնդման գործում ներդրված ավանդի, ՀՀ Հակակոռուպցիոն կոմիտեի հետ սերտ և արդյունավետ համագործակցություն ապահովվելու համար, ինչպես նաև ՀՀ զինված ուժերի կազմակերպման 33-ամյակի առթիվ պարգևատրումը»։ Ժամացույցի տեխնիկական բնութագիրը հետևյալն է․

«ԳՆՈՄՈՆ» ապրանքանիշի ձեռքի արծաթյա, ոսկեզօծ ժամացույց, արծաթյա 925 հարգի 25-26 գրամ, ոսկեպատում բարձր որակի ոսկով, ոչ պակաս 3 մկմ, գոտին բնական կաշի, կարմիր տուփով։

Հիշեցնենք, որ «Հանրային ծառայության մասին» օրենքի 29-րդ հոդվածում, որով սահմանված են հանրային պաշտոն զբաղեցնող անձի և հանրային ծառայողի կողմից նվերներ ընդունելու սահմանափակումները, նշվում է, որ հանրային պաշտոն զբաղեցնող անձանց և հանրային ծառայողներին թույլատրվում է ընդունել միայն հետևյալ նվերները.

1. պետական կամ պաշտոնական այցերի կամ միջոցառումների, ինչպես նաև աշխատանքային այցերի, գործուղումների շրջանակներում կամ ժամանակ տրվող նվերները կամ սովորաբար կազմակերպվող հյուրասիրությունը.
2. ծառայողական օգտագործման նպատակով անվճար տրամադրվող նյութերը.
3. կրթաթոշակը, դրամաշնորհը կամ նպաստը՝ տրված հրապարակային մրցույթի արդյունքով` մյուս դիմորդների նկատմամբ կիրառված նույն պայմաններով և նույն չափանիշներով կամ թափանցիկ այլ գործընթացի արդյունքով.
4. օտարերկրյա պետությունների, միջազգային կազմակերպությունների կամ այլ անձանց կողմից տրվող արարողակարգային նվերները:

Եթե 1-ին կամ 4-րդ կետերով նախատեսված նվերի արժեքը (բացառությամբ սովորաբար կազմակերպվող հյուրասիրությունների) գերազանցում է 60․000 դրամը, ապա այն համարվում է պետական կամ համայնքային սեփականություն: Հանրային պաշտոն զբաղեցնող անձինք և հանրային ծառայողները պարտավոր են սահմանված կարգով այն հանձնել պետությանը կամ համայնքին:

Բացի այդ, հանրային պաշտոն զբաղեցնող անձը և հանրային ծառայողը պարտավոր են իրենց կողմից ստացված թույլատրելի նվերները հաշվառեն նվերների հաշվառման ռեեստրում։

40․000 դրամը չգերազանցող արժողությամբ թույլատրելի նվերները ենթակա չեն հաշվառման, բացառությամբ նույն աղբյուրից 6 ամսվա ընթացքում նվերի ստացման պարբերական (5 և ավելի) բնույթ կրող դեպքերի։

Նվերների արժեքը գնահատվում է` հիմք ընդունելով այն ողջամիտ շուկայական արժեքը, որը հնարավոր է գնահատել բաց աղբյուրների միջոցով:

Հավելենք նաև, որ հանրային պաշտոն զբաղեցնող անձանց և հանրային ծառայողներին, եթե որևէ նվեր է տրվում իրենց պաշտոնեական (ծառայողական) պարտականությունների իրականացման հետ կապված, ապա անկախ դրա չափից, գնից, եթե անգամ այն արժե 100 դրամ՝ չեն կարող ընդունել դա։

Մանրամասները՝ տեսանյութում։

Էմմա Միքայելյան