ՏԵՍԱՆՅՈՒԹ․ Ձեր նկարը պարանի վրա է․ Անդրանիկ Քոչարյանի դեմ՝ լրագրողների ակցիան

ԱԺ-ում Անդրանիկ Քոչարյանի կողմից լրագրողին վիրավորելուց հետո այս պահին տեղի է ունենում Լրագրողների 2-րդ ակցիան։ Լրագրողները հայցում են, որ միջադեպի կապակցությամբ Անդրանիկ Քոչարյանը ներողություն խնդրի լրագրողներից։

Հիշեցնենք, որ մարտի 20-ին ՔՊ-ական պատգամավոր, ԱԺ անվտանգության և պաշտպանության հանձնաժողովի նախագահ Անդրանիկ Քոչարյանը հերթական անգամ աչքի է ընկել լկտի վարքագծով՝ այս անգամ թվիրավորելով կին լրագրողին։

Պատգամավորը ճեպազրույցի ժամանակ թիրախավորել է «Tribune» կայքի լրագրող Հռիփսիմե Ջեբեջյանը։ ԱԺ-ում ճեպազրույցի ժամանակ նա նախ ցուցում է տվել, թե որտեղ պետք է կանգնի լրագրողը։

«Էն կողմ կանգնեք, էդպես եմ ուզում, մի խանգարեք ձեր գործընկերներին, դուք միշտ ինձ խանգարում եք, հակառակ դեպքում ես կգնամ, չեմ պատասխանի ձեր գործընկերներին։ Ես առաջնորդվում եմ հոգևորականի այն առաջարկով, որ ձեզ արեց՝ «մաքրեք ձեր շրթունքները»»,-ասել է Քոչարյանը։

Լրագրողի դիտարկմանը, թե ինչու եք բուլինգի ենթարկում լրագրողին՝ նա պատասխանեց, որ լրագրողի չէ, այլ տիկին Ջեբեջյանի հետ է խոսում։

Լրագրողն էլ հորդորեց հիշել, թե ինչու էր հոգևորականը հորդորում «մաքրել շուրթերը»։

«Ձեր պահվածքը ոչ տղամարդկային է, ոչ մարդկային է, ոչ էլ հարիր է պաշտոնյայի, չե՞ք կարծում, որ պետք է ներողություն խնդրեք։ Ձեր պահվածքը անթույլատրելի է»,-ասաց Ջեբեջյանը։

Քոչարյանը հրաժարվել է ներողություն խնդրել և մտել է իր առանձնասենյակ։

Մանրամասները՝ տեսանյութում․