Բաքուն այսօր արձագանքել է Հայաստանի վարչապետ Նիկոլ Փաշինյանի պնդումներին, որակելով դրանք, որպես անհիմն:
«Մայիսի 15-ին Ալբանիայում Ադրբեջանի հանրային հեռուստատեսությանը տված հարցազրույցի ժամանակ Հայաստանի վարչապետը կրկին փորձեց մոլորեցնել միջազգային հանրությանը Հայաստանի Սահմանադրության մեջ տարածքային պահանջների և Մինսկի խմբի լուծարման վերաբերյալ», – հայտնել է Ադրբեջանի արտաքին գործերի նախարարության խոսնակ Այխան Հաջիզադեն։
«Անհերքելի փաստ է, որ միջազգային համաձայնագրերում տարածքային ամբողջականության աջակցության արտահայտությունները որևէ նշանակություն չունեն հայկական կողմի համար։ Սա ապացուցելու համար տեղին է հիշել Հայաստանի կողմից հաճախակի հիշատակվող Ալմաթիի հռչակագրին միանալու գործընթացը և այն, թե ինչպես է այն կոպտորեն խախտել այդ համաձայնագիրը։ Ալմաթիի հռչակագրին միանալու գործընթացում հայկական կողմից արված վերապահումները և գործող օրենսդրական ակտերի գոյությունը, որոնք դեմ են Ղարաբաղը որպես Ադրբեջանի մաս ճանաչելուն, լավ հայտնի են», – նշել է նա։
Ըստ խոսնակի՝ ՀՀ զինանշանը, որը հիշատակվում է Սահմանադրության 21-րդ հոդվածում, արտացոլում է ՀՀ տարածքային պահանջները հարևանների նկատմամբ։ Այսպիսով, անկախ նրանից, թե ՀՀ-ն որ պայմանագրերին է միանում, Ադրբեջանի տարածքային ամբողջականությանը հակասող սահմանադրական դրույթների պահպանումը հստակորեն ծառայում է որոշակի նպատակի։
«Ավելին, ավելի լավ կլիներ, որ հայկական կողմը բացատրեր, թե ինչու գրեթե 35 տարի չի պահպանել 1991 թվականի սահմանները և տարածքային ամբողջականության վերաբերյալ Ալմաթիի հռչակագրի վրա հիմնված համաձայնագրերը, և ինչու է հրաժարվել ընդունել խորհրդային քարտեզներում արտացոլված սահմանները»,- հավելել է նա։
«Բացի վերը նշվածից, հայկական կողմը չի հրաժարվել այսպես կոչված «Արևմտյան Հայաստանի» պահանջներից: Հատկանշական է, որ Սահմանադրության նախաբանի, և, հետևաբար, Անկախության հռչակագրի՝ Դատարանի որոշման մեջ «հայոց պետականության հիմնարար սկզբունքներ» որակումը, դրանք անփոփոխ հռչակելով, ցույց է տալիս այն սպառնալիքի չափը, որը ներկայացնում են Հայաստանի՝ Ադրբեջանի տարածքների նկատմամբ պահանջները», – հավելել է Հաջիզադեն։
Ադրբեջանի ԱԳՆ խոսնակը նշել է, որ Հայաստանի վարչապետի այն տրամաբանությունը, որով նա առաջարկում է անտեսել այս հարցերը, ցույց է տալիս, որ Հայաստանը հետաքրքրված չէ կայուն խաղաղությամբ և պարզապես փորձում է պահպանել այս իրավիճակը որպես Ադրբեջանի դեմ ապագա ագրեսիայի պահեստային տարբերակ:
«Բացի այդ, Հայաստանի փորձերը՝ դեմ կանգնելու Մինսկի խմբի պաշտոնական լուծարմանը, որը անցյալի հակամարտության մնացորդ է, և գործընթացը խաղաղության համաձայնագրի հետ կապելու ջանքերը ցույց են տալիս Ադրբեջանի դեմ թաքնված օրակարգի գոյությունը»։
«Այս ամենը ևս մեկ անգամ ապացուցում է, որ Հայաստանի Սահմանադրության փոփոխությունը, որը ուղղակի սպառնալիք է ներկայացնում Ադրբեջանի ազգային անվտանգության համար, խաղաղության հիմնարար պայման է, և դա պահանջելը Ադրբեջանի օրինական իրավունքն է», – եզրափակել է Հաջիզադեն։
Անի Վարդանյան
.gif)
