Սիրիան ԵՄ-ի աջակցության կարիքն ունի Իսրայելի միջամտությանը վերջ տալու համար․ Ալ-Շարաա

Սիրիայի ժամանակավոր նախագահ Ահմեդ ալ-Շարաան չորեքշաբթի երեկոյան հեռախոսազրույց է ունեցել Եվրոպական խորհրդի նախագահ Անտոնիո Կոստայի հետ։ Զրույցի ընթացքում քննարկվել է ԵՄ անդամների որոշումը՝ վերացնել նախկինում Սիրիայի դեմ սահմանված տնտեսական պատժամիջոցները, հաղորդում է SANA գործակալությունը։

Ալ-Շարաան երախտագիտություն է հայտնել ԵՄ ղեկավարությանը և անդամ երկրներին պատժամիջոցների չեղարկման որոշման համար՝ այն անվանելով «պատմական քայլ, որը կօգնի երկիրը շարժել դեպի ավելի կայուն ապագա»։ Ժամանակավոր նախագահը ընդգծել է «այս փուլում միջազգային հանրության կողմից Սիրիային ցուցաբերվող աջակցության կարևորությունը»:

Բացի այդ, ալ-Շարաան նշել է, որ «իսրայելական միջամտությունը շարունակում է ազդեցություն ունենալ Սիրիայի վրա»։ Նա մատնանշել է «Եվրամիության կողմից Սիրիային աջակցելու անհրաժեշտությունը, որպեսզի այդ միջամտությունը դադարեցվի»։

Տնտեսական համագործակցության ամրապնդման համատեքստում նախագահ ալ-Շարաան ողջունել է եվրոպական ընկերություններին, որոնք հետաքրքրված են Սիրիայում ներդրումներ կատարելով, գրում է SANA-ն։