Երևանի քաղաքապետ Տիգրան Ավինյանն ընդունել է Եվրոպայի խորհրդի տեղական և շրջանային իշխանությունների կոնգրեսի նախագահ Մարկ Քուլսի գլխավորած պատվիրակությանը: Մարկ Քուլսը Հայաստանում է «Երևանյան երկխոսություն» համաժողովին մասնակցելու նպատակով:
Ինչպես «Արմենպրես»-ը տեղեկանում է Երևանի քաղաքապետարանի տարածած հաղորդագրությունից, ողջունելով հյուրերին՝ Տիգրան Ավինյանը նշել է, որ Երևանի քաղաքապետարանը կարևորում և բարձր է գնահատում Եվրոպայի խորհրդի տեղական և տարածաշրջանային իշխանությունների կոնգրեսի դերը և կատարած աշխատանքը:
Տիգրան Ավինյանը նաև տեղեկացրել է, որ տեղական ժողովրդավարության զարգացման համատեքստում Երևանի քաղաքապետարանը նախաձեռնել է «Երևանում տեղական ինքնակառավարման մասին» օրենքում մի շարք փոփոխություններ, որոնք նպատակ ունեն ամրապնդել տեղական ինքնակառավարման ինստիտուցիոնալ հիմքը:
Շնորհակալություն հայտնելով ջերմ ընդունելության համար՝ Մարկ Քուլսը շնորհավորել է Երևանի քաղաքապետ Տիգրան Ավինյանին՝ Կոնգրեսում պատվիրակի դերը ստանձնելու առթիվ: Եվրոպայի խորհրդի տեղական և շրջանային իշխանությունների կոնգրեսի նախագահը նաև հույս է հայտնել, որ համաժողովի աշխատանքների ընթացքում համագործակցությունն ավելի սերտ կլինի:
.gif)
