Օրերս ArmLur.am լրատվականին ահազանգել էին Արմավիր մարզի Փարաքար խոշորացված համայնքի Թաիրով բնակավայրի բնակիչներն այն մասին, որ շուրջ մեկ ամիս է, ինչ նրանք զրկված են մաքուր, խմելու ջրից:
Ահազանգի հետքերով ArmLur.am-ն այցելել էր Թաիրով համայնք՝ զրուցելու բնակիչների հետ՝ առավել մանրամասն խնդրին տեղեկանալու համար: ArmLur.am-ի հետ զրույցի ժամանակ բնակիչները շեշտում էին, որ ջրավազաններին տրամադրելու նպատակով են ամռանը փոխում ջրերը:
Նրանք նաև նշեցին, որ խնդիրն առաջացել է «Վեոլիա Ջուր» ընկերությունից օգտվելուց հետո:
Տեղի ունեցածի վերաբերյալ «Վեոլիա Ջուր» ընկերությունը հանդես է եկել պարզաբանմամբ.
«Տարիներ շարունակ ամռան ամիսներին Փարաքար խոշորացված համայնքի Թաիրով համայնքի ջրամատակարարումն իրականացվել է Արարատյան խորքային հորերից:
2017 թ.-ի հունվարից «Վեոլիա Ջուր» Ընկերությունը, ստանձնելով ՀՀ ողջ տարածքի ջրամատակարարումը, որոշակի տեխնիկական լուծումներ տալով, փորձել է բարելավել տվյալ և հարակից տարածքների ջրամատակարարումը և սկսել է այստեղ իրականացնել ջրամատակարարում Գառնու, Արզականի աղբյուրներից, որոնք իրենց զգայորոշական ցուցանիշներով տարբերվում են խորքային հորերի ջրերի որակական ցուցանիշներից:
Ամռան ամիսներին, շոգ եղանակի հետ կապված, ջրապահանջի ծավալների աճով պայմանավորված մեծանում է ջրասպառումը, և Գառնու, Արզականի աղբյուրների ջուրը ուղղակիորեն չի բավականացնում տվյալ տարածքի ջրամատակարարումն ապահովելու համար, ուստի որոշ բնակավայրերում ջրամատակարարումն իրականացվում է Արարատյան խորքային հորերից:
Ճիշտ է, վերջիններիս ջրի որակն իր զգայորոշական և ֆիզիկաքիմիական հատկություններով զիջում է լեռնային աղբյուրների ջրին, սակայն միանգամայն համապատասխանում է սանիտարական կանոնների և նորմերի պահանջներն:
Ամռան վերջին, ջրասպառման ծավալների կրճատմանը զուգահեռ, նորից անցում է կատարվում Գառնու, Արզականի ջրաղբյուրներով ջրամատակարարմանը: Տեղեկացնում ենք նաև, որ այս ժամանակահատվածում ևս առաջին իսկ հնարավորության դեպքում Արարատյան ջրաղբյուրին պարբերաբար ավելացվում է Գառնու, Արզականի աղբյուրի ջրերից:
«Վեոլիա Ջուր» ՓԲԸ-ի համար խմելու ջրի որակը առաջնային խնդիրներից մեկն է, և հնարավոր ամեն քայլ ձեռնարկվում է այն ՀՀ-ում գործող սանիտարական նորմերի և կանոնների պահանջներին համապատասխան պահելու համար»։
Նանիկ Աղասյան
.gif)
