Հայտնի են դարձել ԱՄՆ-Իրան միջուկային բանակցությունների նոր փուլի հավանական վայրն ու ժամկետները

ԱՄՆ-ի և Իրանի միջև բանակցությունների հաջորդ փուլը, որը վերաբերում է Թեհրանի միջուկային ծրագրերին, նախատեսվում է անցկացնել հունիսի 13-ին Օսլոյում կամ հունիսի 15-ին Մասկաթում: Այս մասին X սոցիալական հարթակում գրել է Axios-ի թղթակից Բարակ Ռավիդը:

«ԱՄՆ պաշտոնյան ինձ հայտնեց, որ ԱՄՆ-ի և Իրանի միջև միջուկային բանակցությունների վեցերորդ փուլը տեղի կունենա կա՛մ ուրբաթ օրը Օսլոյում, կա՛մ կիրակի օրը Մասկաթում», – նշել է Ռավիդը՝ առանց հավելյալ մանրամասներ հաղորդելու:

Մինչ այդ, ԱՄՆ նախագահ Դոնալդ Թրամփը հայտարարել էր, որ Իրանի հետ բանակցությունների նոր փուլը տեղի կունենա հունիսի 12-ին: Նրա խոսքով՝ Վաշինգտոնը պնդում է, որ Թեհրանը դադարեցնի ուրանի հարստացման գործընթացը իր տարածքում: Սակայն իրանական իշխանությունները մերժել են այս պահանջը, ընդգծել է ԱՄՆ նախագահը:

Իրանի և ԱՄՆ-ի ներկայացուցիչների միջև բանակցությունների հինգերորդ փուլը տեղի էր ունեցել մայիսի 23-ին Հռոմում՝ Իրանի միջուկային ծրագրի շուրջ ընթացող վեճերը կարգավորելու նպատակով: Հունիսի 1-ին Սպիտակ տունը հայտարարել էր, որ նախագահ Թրամփի հատուկ բանագնաց Սթիվ Ուիթկոֆը իրանական պաշտոնյաներին է ներկայացրել «մանրամասն և ընդունելի» առաջարկ՝ Թեհրանի միջուկային ծրագրի վերաբերյալ:

Axios-ի համաձայն՝ առաջարկը նախատեսում է Իրանին թույլատրել շարունակել ուրանի հարստացումը ցածր մակարդակներով՝ հետագայում որոշվելիք ժամանակահատվածի համար: Հունիսի 7-ին Թրամփը կրկին հայտարարել է, որ Իրանը չպետք է զբաղվի ուրանի հարստացմամբ՝ զգուշացնելով, որ չհամապատասխանելու դեպքում Վաշինգտոնից հետևանքներ կլինեն:

Անի Վարդանյան