Այսօր ArmLur.am-ի հետ զրույցում «Մայր Հայաստան» շարժման առաջնորդ Անդրանիկ Թևանյանը խոսեց Դավիթ Համբարձումյանին վարչապետ առաջադրելու և անվստահություն հայտնելու գործընթացի մասին․
«Նիկոլ Փաշինյանին հեռացնելու ցանկացած գործիքակազմում՝ այդ թվում անվստահություն հայտնելը կիրառելի է, բայց այդ ամենի համար ժողովրդի աջակցությունն է հարկավոր։ Մնացածը տակտիկայի հարց է»,- ասաց Անդրանիկ Թևանյանը։
Նշենք, որ «Պատիվ ունեմ» խմբակցությունը վարչապետի թեկնածու է առաջադրում Մասիսի համայնքապետ Դավիթ Համբարձումյանին։ Այս մասին գրել է խմբակցության նախագահ Հայկ Մամիջանյանը։
«Հաշվի առնելով Հայաստանի Հանրապետական կուսակցության Գործադիր մարմնի հայտարարությունը՝ Հայաստանի Հանրապետության Ազգային Ժողովի «Պատիվ ունեմ» խմբակցությունը սույն թվականի հունիսի 7-ին կայացած նիստում միաձայն որոշեց «Ազգային Ժողովի կանոնակարգ» սահմանադրական օրենքի համաձայն վարչապետին անվստահություն հայտնելու առաջարկ ներկայացնել՝ որպես թեկնածու առաջադրելով Մասիս համայնքի ղեկավար, Հայաստանի Հանրապետական կուսակցության Խորհրդի անդամ Դավիթ Համբարձումյանին»,-գրել է Մամիջանյանը։
Մարիանա Սարգսյան
.gif)
