Հովիկ Աբրահամյանը ձեր «տղան է», դե փող տվե՛ք

Armlur.am լրատվականն այսօր Հովիկ Աբրահամյանի նշանակման,  ԱԺ չորս ուժերի հետագա ճակատագրի և ներքաղաքական այլ հարցերի շուրջ զրուցեց ՆԺԿ կուսակցության ղեկավար Արամ Կարապետյանի հետ:

-Պարո՛ն Կարապետյան, քաղաքական ի՞նչ դրդապատճառներով  էր պայմանավորված Հովիկ Աբրահամյանի նշանակումը վարչապետի պաշտոնում, շախմատային  ի՞նչ քայլ արեց սրանով Սերժ Սարգսյանը:

-Հովիկ Աբրահամյանի նշանակումն ուրույն նշանակում  է:

Յուրաքանչյուր ժամանակաշրջան ունի իշխանության իր դեմքը: Իշխանության ուրույն դեմքը Հովիկ Աբրահամյանն է: Վարչապետի պաշտոնում նրա նշանակման դրդապատճառները երկուսն էին` արտաքին քաղաքական և ներքաղաքական:

Արտաքին քաղաքական դրդապատճառն այն է, որ ՌԴ-ում տնտեսական վատ վիճակ է, որը չի բարելավվելու: Եթե նկատում եք` հարավային մի շարք երկրներում վարչապետներ են փոխվում: Ընդհանուր այս վիճակը վատթարացման է բերելու, որն էլ իր հերթին կհանգեցնի  մոբիլիզացիայի:  Այդ մոբիլիզացիայի համար օգտագործվելու է  յուրաքանչյուր հնարավորություն, այսինքն` կոնկրետ մեր պարագայում Սփյուռքի հայերի, հատկապես՝ ՌԴ-ում բնակվող հայերի, քաղաքական-գործնական կրիմինալ կապերի ներուժը:

Ներքաղաքական առումով ասեմ հետևյալը` բարդ է լինելու հիմա դուրս գալ այն լոզունգներով, որոնք նախատեսվում էին: Ինչքան էլ Տիգրան Սարգսյանին շնորհակալություն հայտնեցին իշխանությունները, իմ կարծիքով՝ նա վատ վարչապետ էր: Միգուցե նա վատ ֆինանիստ չէ, բայց վատ վարչապետ էր տնտեսական առումով:

Հայաստանում տնտեսական կատեգորիաները հաշվի չեն առնվում. մեզ մոտ օլիգարխը պայքարում է օլիգարխիկ տնտեսության դեմ:

Իշխանական բուրգի  մեջ եղած որոշակի ուժեր փորձեցին համատեղվել և պայքարել Սերժ Սարգսյանի դեմ: Ռուսերեն մի խոսք կա` «Роздражител». այդ «Pоздражител-ը» Տիգրան Սարգսյանն էր, ում հանեցին: Հիմա ինչի՞ դեմ պետք է  պայքարեին. տրամաբանորեն նրանք պիտի պայքարեին կա՛մ Սերժ Սարգսյանի դեմ, (հո Հովիկ Աբրահամյանը ԱԺ նախագահ եղած ժամանակ իր դեմ չէ՞ր պայքարելու), իսկ քաղաքական ուժերի մի մասը դրան չէր գնա, կա՛մ էլ պետք է մտածեին ինչ անել:  Կա մեկ այլ բան` Սերժ Սարգսյանն ասել է` ոչ սահմանադրական բարեփոխումների դեպքում ո՛չ վարչապետ է լինելու, ո՛չ նախագահ:

Ակնհայտ է, որ Հովիկ Աբրահամյանի հետ հասարակության ինչ-որ շերտ չի աշխատի: Իսկ չի աշխատի հասարակության այն մասը, որը կրթված է, երիտասարդ, արդիական հայացքներ ունի, քաղաքացիական հասարակության մաս  է: Այդ կիրթ հատվածին Սերժ Սարգսյանն ասում է` ես, Լևոն Տեր-Պետրոսյանը և Քոչարյանը թողնենք գնանք ու զբաղվենք կուսակցական աշխատանքով, որովհետև այդ երիտասարդ մասը չի ընդգրկվելու ներիշխանական բուրգի մեջ:

-Հովիկ Աբրահամյանին վարչապետի պաշտոնում նշանակելով` Սերժ Սարգսյանը լուծե՞ց իրեն հաջորդողի խնդիրը:

-Ո՛չ: Դրա լուծումը պետք է այլ տեղ գտնել: Պետք է հասկանալ` Սերժ Սարգսյանը ոնց է փրկելու իրավիճակը: Սերժ Սարգսյանն իր հարաբերությունները փչացրել է Արևմուտքի հետ, որը Հայաստանին և իրեն՝ Սարգսյանին չի համարում գործընկեր:

Եթե նույնիսկ Եվրոասոցացման համաձայնագիրը ստորագրեր Հայաստանը, Եվրոպայի համար Ուկրաինա չէինք դառնա: Հետևաբար, մենք մնում ենք ՌԴ-ի հետ փոխհարաբերությունների մաս: Սերժ Սարգսյանը հասկանում է, որ ՌԴ-ի տնտեսական վիճակը վատանում է, հետևաբար, ինչպե՞ս է լուծելու մնացած հարցերը, մասնավորապես՝ մեր ազգաբնակչության 80 տոկոսն ապրում է դրսից եկող բարեկամական օգնությունների հաշվին:

Այսինքն` եթե փողը դրսից չի գալու, ի՞նչ է լինելու Հայաստանի վիճակը: Սերժ Սարգսյանը, Հովիկ Աբրահամյանին նշանակելով, լուծում է առօրեական խնդիր, այն է` Հովիկ Աբրահամյանը Մաքսային միություն մտնելու ճանապարհին խաղեր չի տալու: Այսինքն` Աբրահամյանը ձեր (նկատի ունի ՌԴ-ի-խմբ.) «տղան է», դե փող տվե՛ք: Նա  Տիգրան Սարգսյանը չէ, որ Բելգիայում մի բան ասի, ձեր մոտ ուրիշ բան ասի, խաղեր տա, արժութային հիմնադրամից փողեր բերի, որովհետև հետները լավ է:

-Այսինքն` իշխանության վերարտադրության հարց Սերժ Սարգսյանի օրակարգում չկա՞: 

-Այո՛: Ի՞նչ իրավահաջորդություն: Գնալով վիճակը դառնում է պատերազմական. Ուկրանիայում քաղաքացիական պատերազմում ներգրավվելու է նաև ՌԴ-ը, տնտեսական սանկցիաներ են կիրառվելու ՌԴ-ի դեմ, որը չի կարող հաշվի չառնել իշխանությունը:

-Աբրահամյանի նշանակումով քաղաքական ո՞ր ուժը ի՞նչ շահեց կամ ի՞նչ կորցրեց:

-Դա արդեն իրենց հարցրե՛ք: Ես մի բան կարող եմ ասել` իշխանությունը կրակում է իր ամբողջական փափուշտներով, որոնցից մեկն էլ Աբրահամյանն է:

-Ի՞նչ նկատի ուներ իշխանությունը, երբ հայտարարեց, որ Հովիկ Աբրահամյանն ազատ է վարել կադրային քաղաքականությունը:

-Դա նշանակում է, որ Հովիկ Աբրահամյանը կարող է յուրաքանչյուրին ընդգրկել կառավարությունում: Մոբիլիզիացիա ասվածը նշանակում է մի բան` դրսի, ներսի ու կրիմինալ ուժերը միավորել գործադիրի ձեռքում, որպեսզի փողոց դուրս եկողները քիչ լինեն:

-Ակնկալիքներ պե՞տք է ունենա  հասարակությունը նոր վարչապետից:

-Հասարակությունը վաղուց իշխող դասակարգի նշանակումներից սպասելիքներ չունի և կորցրել է վստահությունը: Հասարակությունը հասկանում է`Հայաստանը կարելի է այս վիճակից դուրս հանել միայն մի դեպքում, երբ իշխող դասակարգը կհեռանա:

-Պարո՛ն Կարապետյան, այս ամենի համատեքստում ի՞նչ ճակատագիր է սպասվում «հրաշալի քառյակին»:

-Ինչպես դուք չգիտեք, այնպես էլ ես ու իրենք չգիտեն:

-Փաստորեն, հանրությունը հույսը պետք է  կապի 2018-ի նախագահական ընտրությունների  հետ փոփոխություններ տեսնելու համար:

-Երբ Յանուկովիչին մի 7 ամիս առաջ  հարցրել են`դուք  առաջադրվելու եք, ինքն ասել էր` ես չեմ առաջադրվելու, ես ընտրված եմ:

Սոնա Դավթյան