Թրամփը հրամայել է տեղակայել երկու միջուկային սուզանավ՝ ի պատասխան Մեդվեդևի հայտարարությունների

ԱՄՆ նախագահ Դոնալդ Թրամփը, շարունակելով իր վեճը Ռուսաստանի Անվտանգության խորհրդի փոխնախագահ Դմիտրի Մեդվեդևի հետ, հայտարարել է, որ իր հռետորական սպառնալիքներին ի պատասխան կուղարկի երկու ամերիկյան միջուկային սուզանավ «համապատասխան տարածաշրջաններ»։ Նա չի մանրամասնել, թե որ տարածաշրջանների մասին է խոսքը։

«Հաշվի առնելով Ռուսաստանի նախկին նախագահ, այժմ Ռուսաստանի Անվտանգության խորհրդի փոխնախագահ Դմիտրի Մեդվեդևի կողմից արված խիստ սադրիչ հայտարարությունները, ես հրամայել եմ երկու միջուկային սուզանավ տեղակայել համապատասխան տարածաշրջաններում, եթե այս անզգույշ և սադրիչ հայտարարությունները պարզվեն, որ ավելին են, քան պարզապես խոսքեր: Բառերը նշանակություն ունեն և հաճախ կարող են հանգեցնել չնախատեսված հետևանքների: Հուսով եմ, որ այս դեպքում դա տեղի չի ունենա», – գրել է Թրամփը Truth Social սոցիալական ցանցում:

Երկու քաղաքական գործիչների միջև հեռակա վեճը շարունակվում է արդեն երկրորդ օրը։ Ամեն ինչ սկսվեց նրանից, որ Թրամփը չորեքշաբթի օրը հայտարարեց օգոստոսի 1-ից Հնդկաստանի համար 25% մաքսատուրք մտցնելու մասին՝ այն կապելով Մոսկվայի հետ։

«Հնդկաստանը միշտ իր ռազմական տեխնիկայի մեծ մասը գնել է Ռուսաստանից և Չինաստանի հետ միասին Ռուսաստանից էներգիայի ամենամեծ գնորդն է, մինչդեռ բոլորը ցանկանում են, որ Ռուսաստանը դադարեցնի սպանությունները Ուկրաինայում», – ասել է Թրամփը։

Այնուհետև Թրամփը թվիթերում գրառում է այս հարցի վերաբերյալ՝ հիշատակելով Մեդվեդևին.

«Ինձ համար միևնույն է, թե ինչ է անում Հնդկաստանը Ռուսաստանի հետ։ Նրանք կարող են միասին ոչնչացնել իրենց մեռած տնտեսությունները, ինձ համար միևնույն է։ Մենք շատ քիչ համագործակցություն ունենք Հնդկաստանի հետ, նրանց մաքսատուրքերը չափազանց բարձր են, գրեթե ամենաբարձրը աշխարհում։ Եվ Ռուսաստանն ու ԱՄՆ-ն գրեթե ոչ մի գործ չունեն միասին։ Եկեք այսպես մնանք և ասենք Մեդվեդևին՝ Ռուսաստանի ձախողված նախկին նախագահին, ով դեռ իրեն նախագահ է համարում, որ զգույշ լինի իր խոսքերի հետ։ Որովհետև նա մտնում է շատ վտանգավոր տարածք»։

Անհնար է ճշգրիտ ասել, թե Մեդվեդևի հայտարարությունները ինչով են զայրացրել Թրամփին։ Սակայն, այս շաբաթվա սկզբին Ռուսաստանի նախկին նախագահը մեկնաբանեց Թրամփի պահանջը՝ 10 օրվա ընթացքում սկսել Ուկրաինայի պատերազմի խաղաղ կարգավորումը.

«[Թրամփի] յուրաքանչյուր նոր վերջնագիր սպառնալիք է և քայլ դեպի պատերազմ․ ոչ թե Ռուսաստանի և Ուկրաինայի միջև, այլ իր սեփական երկրի հետ։ Մի՛ հետևեք Քնկոտ Ջոի [ինչպես Թրամփն ինքն էր անվանում նախկին նախագահ Ջո Բայդենին] ճանապարհը»։