ՏԵՍԱՆՅՈՒԹ․ 331 հազար դրամ արժողությամբ գրիչ՝ Մակրոնից․ Ինչ նվերներ է ստացել Նիկոլ Փաշինյանը

ՀՀ վարչապետ Նիկոլ Փաշինյանի համար օգոստոսը նվերաշատ է եղել։ Պետական պատվիրակությունների այցերից ստացված նվերները հերթով հայտնվել են Կոռուպցիայի կանխարգելման հանձնաժողովի ռեեստրում։

Այսպիսով՝ ինչ նվեր է ստացել Փաշինյանը, ո՞ւմ կողմից և որքան արժեն դրանք․

Վարչապետ Նիկոլ Փաշինյանը հայտարարագրել է դեռ 2024 թվականի հոկտեմբերին ստացած նվերը, սակայն ինչու ուշացումով, հայտնի չէ։ Փաշինյանին Իրանի Իսլամական Հանրապետության նախագահի առաջին տեղակալ Մոհամմադ Ռեզա Արեֆը նվիրել է պարսկական Մինաքարի արվեստի ծաղկաման, ձեռագործ աշխատանք, պատրաստված է պղնձից՝ մինային ծածկույթով, արտադրված Իրանի Սպահան նահանգում։ Ծաղկամանն արժեցել է 134 հազար 619 դրամ։

Հաջորդ նվերը ստացել է 2024 թվականի սեպտեմբերի 16-ին Ֆրանսիայի Եվրոպայի և արտաքին գործերի նախարար Ստեֆան Սեժուրնեի գլխավորած պատվիրակության կողմից։ Նվերն արժեցել է 127, 413 հազար դրամ եղել է տղամարդու հագուստի թևածալքի վրա տեղադրված ճարմանդ։ Զարդը ձեռագործ է, պատրաստված 925 հագի արծաթից,  ռոդիումապատ։

Հայտարարագրված ամենաթանկարեք նվերը Նիկոլ Փաշինյանը ստացել է Էմանուել Մակրոնից, սակայն վրիպակի կամ սխալմունքի արդյունքում նվերը ստանալու ամսաթիվը նշված է 2025 թվականի հոկտեմբերի 3-ը։
Dupont ապրանքանիշի գրիչ է նվիրել Մակրոնը Ձաշինյանին Ելիսեյան պալատում,  Գրիչը եղել է անհատական պատվեր, այն պատրաստված է կապույտ և ոսկեգույն գույներով։ Փաշինյանի համար հատուկ պատվիրված գրիչն արժեցել է 331 հազար 870 դրամ։

Հիշեցնենք, որ «Հանրային ծառայության մասին» օրենքի 29-րդ հոդվածում, որով սահմանված են հանրային պաշտոն զբաղեցնող անձի և հանրային ծառայողի կողմից նվերներ ընդունելու սահմանափակումները, նշվում է, որ հանրային պաշտոն զբաղեցնող անձանց և հանրային ծառայողներին թույլատրվում է ընդունել միայն հետևյալ նվերները.

1. պետական կամ պաշտոնական այցերի կամ միջոցառումների, ինչպես նաև աշխատանքային այցերի, գործուղումների շրջանակներում կամ ժամանակ տրվող նվերները կամ սովորաբար կազմակերպվող հյուրասիրությունը.
2. ծառայողական օգտագործման նպատակով անվճար տրամադրվող նյութերը.
3. կրթաթոշակը, դրամաշնորհը կամ նպաստը՝ տրված հրապարակային մրցույթի արդյունքով` մյուս դիմորդների նկատմամբ կիրառված նույն պայմաններով և նույն չափանիշներով կամ թափանցիկ այլ գործընթացի արդյունքով.
4. օտարերկրյա պետությունների, միջազգային կազմակերպությունների կամ այլ անձանց կողմից տրվող արարողակարգային նվերները:

Եթե 1-ին կամ 4-րդ կետերով նախատեսված նվերի արժեքը (բացառությամբ սովորաբար կազմակերպվող հյուրասիրությունների) գերազանցում է 60․000 դրամը, ապա այն համարվում է պետական կամ համայնքային սեփականություն: Հանրային պաշտոն զբաղեցնող անձինք և հանրային ծառայողները պարտավոր են սահմանված կարգով այն հանձնել պետությանը կամ համայնքին:

Բացի այդ, հանրային պաշտոն զբաղեցնող անձը և հանրային ծառայողը պարտավոր են իրենց կողմից ստացված թույլատրելի նվերները հաշվառեն նվերների հաշվառման ռեեստրում։

40․000 դրամը չգերազանցող արժողությամբ թույլատրելի նվերները ենթակա չեն հաշվառման, բացառությամբ նույն աղբյուրից 6 ամսվա ընթացքում նվերի ստացման պարբերական (5 և ավելի) բնույթ կրող դեպքերի։

Նվերների արժեքը գնահատվում է` հիմք ընդունելով այն ողջամիտ շուկայական արժեքը, որը հնարավոր է գնահատել բաց աղբյուրների միջոցով:

Հավելենք նաև, որ հանրային պաշտոն զբաղեցնող անձանց և հանրային ծառայողներին, եթե որևէ նվեր է տրվում իրենց պաշտոնեական (ծառայողական) պարտականությունների իրականացման հետ կապված, ապա անկախ դրա չափից, գնից, եթե անգամ այն արժե 100 դրամ՝ չեն կարող ընդունել դա։

Էմմա Միքայելյան