Այս օրը պատմության մեջ․ ազատություն, գիտություն և նորարարություն

Օգոստոսի 25-ը պատմության էջերում առանձնանում է մի շարք նշանակալի իրադարձություններով, որոնք փոխել են թե՛ քաղաքական իրականությունը, թե՛ գիտության ու մշակույթի ընթացքը։

1944 թվականի օգոստոսի 25-ին ազատագրվեց Փարիզը։ Երկրորդ համաշխարհային պատերազմի ընթացքում դաշնակից ուժերը՝ գեներալ Շարլ դը Գոլի առաջնորդությամբ, վերջ դրեցին նացիստական Գերմանիայի չորս տարվա օկուպացիային։ Փարիզի փողոցները լցվեցին հազարավոր մարդկանցությամբ և տոնական տրամադրությամբ․ քաղաքը կրկին շնչում էր ազատության ոգով։

Օգոստոսի 25-ը հիշատակվում է նաև գիտության ու տեխնոլոգիաների պատմության մեջ։ 1981-ին Voyager 2 տիեզերանավը մոտեցավ Սատուրն մոլորակին, փոխանցելով եզակի լուսանկարներ ու տվյալներ, որոնք ընդլայնեցին մարդկության պատկերացումները հսկայական մոլորակի և նրա օղակների մասին։ Տասնամյակներ անց՝ 2012-ին, նրա “եղբայր” տիեզերանավը՝ Voyager 1-ը, դարձավ առաջին մարդածին օբյեկտը, որը դուրս եկավ միջաստղային տարածք։

Տեխնոլոգիական նոր էջ բացվեց նաև 1991 թվականին, երբ ֆին ուսանող Լինուս Տորվալդսը հրապարակեց իր նախագծի առաջին տարբերակը․ այդ նախագիծը հետագայում ստացավ աշխարհին արդեն հայտնի Linux օպերացիոն համակարգի անունը։ Այս նախաձեռնությունը մեծ ազդեցություն ունեցավ տեղեկատվական տեխնոլոգիաների զարգացման վրա՝ հիմք դնելով բաց կոդով ծրագրային ապահովման շարժմանը։

Բացի դրանից, 1825 թվականին Ուրուգվայը հռչակեց իր անկախությունը Բրազիլական կայսրությունից, իսկ 1916-ին ԱՄՆ-ում ստեղծվեց Ազգային պարկերի ծառայությունը, որը մինչ օրս համարվում է բնության պահպանության ամենաառաջատար պետական կառույցներից մեկը։