Պաղեստին պետություն գոյություն չի ունենա․ Իսրայելի ԱԳ նախարար

Իսրայելի արտաքին գործերի նախարար Գիդեոն Սաարը Վաշինգտոնում ԱՄՆ պետքարտուղար Մարկո Ռուբիոյի հետ հանդիպումից հետո հայտարարել է, որ Պաղեստինը որպես պետություն գոյություն չի ունենա, հաղորդում է Reuters-ը։

«Իսրայելի արտաքին գործերի նախարար Գիդեոն Սաարը, չորեքշաբթի օրը, պատասխանելով Պաղեստինի պետություն ստեղծելու ծրագրերի մասին հարցին, ասել է, որ նման բան չի լինի»,-գրում է Reuters-ը։

Պաղեստին պետությունը ճանաչվել է 147 երկրների կողմից, այդ թվում՝ Ռուսաստանի Դաշնության։ 2024 թվականին Միացյալ Նահանգները վետո դրեց Պաղեստինի ՄԱԿ-ում լիիրավ անդամակցությանը։ 2024 թվականից ի վեր Պաղեստինը ճանաչվել է տասը պետության կողմից, այդ թվում՝ Իռլանդիայի, Նորվեգիայի, Իսպանիայի և Հայաստանի կողմից։

Ռուսաստանի Դաշնության դիրքորոշման համաձայն՝ կարգավորումը հնարավոր է միայն ՄԱԿ-ի Անվտանգության խորհրդի կողմից հաստատված բանաձևի հիման վրա՝ Պաղեստինի պետության ստեղծմամբ 1967 թվականի սահմաններում՝ Արևելյան Երուսաղեմ մայրաքաղաքով։