Նյու Յորքում ՄԱԿ-ի Անվտանգության խորհրդի սեպտեմբերի 18-ի նիստի ընթացքում Իրանի Իսլամական Հանրապետության դեսպանն ու ՄԱԿ-ում մշտական ներկայացուցիչ Ամիր Սաիդ Իրավանին հայտարարել են, որ Իրանը վճռական է շարունակելու իր աջակցությունը Սիրիայի ժողովրդին՝ խաղաղության հաստատման, երկրի կայունության վերականգնման, վերակառուցման եւ ազգային հաշտեցման գործընթացներում։ Իրավանին նշել է, որ այդ աջակցությունն ամբողջությամբ համահունչ է Սիրիայի ժողովրդի կամքին եւ հիմնված է Սիրիայի ինքնիշխանության, միասնության եւ տարածքային ամբողջականության նկատմամբ հարգանքի վրա։
Իր ելույթում Իրավանին նախ անդրադարձել է Սիրիայում առկա խորացող հումանիտար ճգնաժամին՝ ընդգծելով, որ միլիոնավոր սիրիացիներ շարունակում են ապրել կենսական կարիքների սուր պակասի պայմաններում։ Նա նշել է, որ այդ իրավիճակը հիմնականում պայմանավորված է Սիրիայի նկատմամբ կիրառվող միակողմանի հարկադրանքներով եւ միջազգային իրավունքի խախտմամբ սահմանված պատժամիջոցներով, որոնք լրջորեն խոչընդոտում են երկրի վերականգնումը, տնտեսության զարգացմանը եւ փախստականների անվտանգ վերադարձին։ Իրավանին հորդորել է միջազգային հանրությանը՝ դադարեցնել այս «ապօրինի եւ անարդար» միջոցները, որոնք նպաստում են սիրիացի ժողովրդի տառապանքների խորացմանը։
Խոսելով անվտանգության հարցերի մասին՝ Իրավանին ընդգծել է, որ Սիրիայում զինված բախումները եւ ահաբեկչական խմբավորումների, այդ թվում՝ Դաեշի եւ Ալ-Քաիդայի մնացորդների գործողությունները շարունակում են վտանգել թե՛ երկրի, եւ թե՛ տարածաշրջանի խաղաղությունն ու կայունությունը։ Նա առանձնահատուկ ուշադրություն է հրավիրել Իսրայելի կողմից Սիրիայի տարածքի նկատմամբ իրականացվող ռազմական հարվածների վրա՝ դրանք որակելով որպես ագրեսիայի ակտեր եւ միջազգային իրավունքի կոպիտ խախտումներ։ Դեսպանը կոչ է արել ՄԱԿ-ի Անվտանգության խորհրդին չլռել եւ պատասխանատվության ենթարկել Իսրայելի իշխանություններին։
Իրավանին իր խոսքում անդրադարձել է նաեւ Սիրիայի քաղաքական գործընթացին՝ նշելով, որ տեւական խաղաղություն կարող է հաստատվել միայն այն դեպքում, երբ այդ գործընթացը լինի ամբողջությամբ սիրիացիների կողմից ղեկավարվող եւ սեփական շահերից բխող՝ առանց արտաքին միջամտության կամ ճնշումների։ Նա նախազգուշացրել է, որ ցանկացած փորձ՝ արտաքին օրակարգ պարտադրելու կամ երկրում դաշնայնացման գաղափար առաջ տանելու ուղղությամբ, կարող է խաթարել Սիրիայի տարածքային ամբողջականությունը եւ վտանգել ազգային միասնությունը։ Միաժամանակ, Իրավանին ողջունել է ՄԱԿ-ի հատուկ բանագնացի վերջին դիվանագիտական շփումները Սիրիայի իշխանությունների հետ՝ ընդգծելով համապարփակ եւ ներառական քաղաքական երկխոսության անհրաժեշտությունը։
Ամփոփելով իր խոսքը՝ Իրավանին վերահաստատել է Իրանի պատրաստակամությունը շարունակելու համագործակցությունը սիրիացի ժողովրդի հետ՝ միեւնույն ժամանակ վերահաստատելով, որ բոլոր արտաքին ուժերը պետք է հարգեն Սիրիայի ինքնիշխանությունը եւ զերծ մնան երկրի ներքին գործերին միջամտելուց։
Անի Վարդանյան
.gif)
