Հնդկաստանի Արևմտյան Բենգալ նահանգում «Դուրգա Փուջա» փառատոնի ընթացքում ներկայացվել է հնդկական աստվածուհի Դուրգայի քանդակը, որտեղ նա հաղթում է դևին՝ Դոնալդ Թրամփի կերպարանքով։ Սովորաբար Դուրգան հաղթում է Մահիշասուրա անունով դևին, ինչը խորհրդանշում է բարու հաղթանակը չարի նկատմամբ, սակայն այս տարի կազմակերպիչները Թրամփին են ներկայացրել որպես չար ուժերի խորհրդանիշ՝ արտահայտելով դժգոհություն նրա տնտեսական քաղաքականությունից և Հնդկաստանի հանդեպ վերաբերմունքից։
Փառատոնի կազմակերպիչ Սանջայ Բասակը ասել է, որ Թրամփը «փորձում է ճնշել Հնդկաստանին», իսկ մշակութաբանները նշել են, որ Դուրգա Փուջան հաճախ արտացոլում է ժամանակակից քաղաքական և հասարակական լարվածությունները․ նախկինում դևի կերպարով պատկերվել են Բեն Լադենն ու Չինաստանի նախագահ Սի Ցզինպինը։
Քանդակը նաև խորհրդանշում է Հնդկաստանի և ԱՄՆ-ի հարաբերությունների սառեցումը Թրամփի վերադարձից հետո։ Եթե նախկինում նա և Հնդկաստանի վարչապետ Նարենդրա Մոդին միասին հանդես էին գալիս զանգվածային հանրահավաքներում, ապա այժմ Թրամփը բարձր մաքսատուրքեր է սահմանել Հնդկաստանի նկատմամբ, քննադատել է երկրի տնտեսությունը և խստացրել վիզաների պայմանները՝ քայլեր, որոնք ընկալվել են որպես թշնամական և կեղծավոր։ Դևի քանդակը, կազմակերպիչների խոսքով, այս դավաճանության զգացումը արտահայտում է արվեստի միջոցով։
.gif)
