Սամվել Կարապետյանի կալանքի ժամկետը երկարաձգվել է

Գործարար, բարերար Սամվել Կարապետյանի կալանքը երկարաձգվել է 30 օրով. նման որոշում է կայացրել Հակակոռուպցիոն դատարանը՝ Վահե Դոլմազյանի նախագահությամբ։

Նշենք՝ դատարանը հիմնավոր չի համարել Սամվել Կարապետյանին դատախազության կողմից մեղսագրվող փողերի լվացման ու տնտեսական հանցագործությունների մասով մեղադրանքները ու կալանքի երկարացման համար հիմք է ընդունել իբր սահմանադրական կարգի տապալման կոչը։

Նշենք, որ կալանքի ժամկետի ավարտից 2 օր անց նախաքննական մարմինը «Տաշիր» ընկերությունների խմբի հիմնադիր Սամվել Կարապետյանի նկատմամբ առաջադրված մեղադրանքը փոփոխեց: Ավելացվել են Քրեական օրենսգրքի 296-րդ հոդվածի 3-րդ մասի 2-րդ եւ 3-րդ կետերը (իշխանական կամ ծառայողական լիազորությունները կամ դրանցով պայմանավորված ազդեցությունն օգտագործելով առանձնապես խոշոր չափերով փողերի լվացումը):

Հիշեցնենք, որ Սամվել Կարապետյանը կալանավորվել էր հունիսի 18-ին։ Նրան մեղադրանք էր առաջադրվել իշխանությունը զավթելու եւ սահմանադրական կարգը տապալելու հրապարակային կոչեր հնչեցնելու համար։ Ազգային բարերարը չի ընդունում իրեն առաջադրված մեղադրանքները: