Ինչո՞ւ է «Արցախբանկ»-ի կառավարիչը խուսափում արցախցիներից. ահազանգում են արցախցիները

ArmLur.am լրատվականի աղբյուրների փոխանցմամբ, Արցախի պետական նախարար Նժդեհ Իսկանդարյանի հետ հանդիպումից խուսափում է «Արցախբանկ» ՓԲԸ գործադիր տնօրեն և Վարչության նախագահ Արտակ Բալայանը։
Մեր տեղեկություններով՝ հանդիպման թեման առնչվելու է բանկի գործունեությանն ու ֆինանսական հոսքերի վերահսկմանը։

Հատկապես մտահոգիչ է այն հանգամանքը, որ «Արցախբանկ»-ի բաժնետոմսերի շուրջ 45 տոկոսը պատկանել է Արցախի ներդրումային հիմնադրամին։ Սա նշանակում է, որ բանկի գործունեությունը անմիջականորեն առնչվում է պետական և հանրային միջոցների արդյունավետ օգտագործման ու հաշվետվողականության խնդիրներին։

Մեր աղբյուրների համոզմամբ Բալայանի կողմից հանդիպումից խուսափելը կարող է դիտվել ոչ միայն անհատական վարքագիծ, այլև փորձ՝ խուսափելու պատասխանատվությունից ու բաց քննարկումից։ Այս իրավիճակը նոր հարցեր է առաջացնում թե՛ բանկի ղեկավարության, թե՛ հիմնադրամի գործունեության օրինականության և վերահսկողության վերաբերյալ։

Մեր տեղեկության հավաստիությունը ճշտելու համար փորձեցինք կապ հաստատել ԱՀ պետնախարար Նժդեհ Իսկանդարյանի հետ, սակայն մեր զանգերն անպատասխան մնացին։

Նանիկ Աղասյան