Ուկրաինան հայտնել է Ռուսաստանի գաղտնի «Օրեշնիկ» հրթիռային կայանը ոչնչացնելու մասին

Ուկրաինայի հատուկ ծառայությունները հայտնել են, որ ոչնչացրել են Ռուսաստանի գաղտնի «Օրեշնիկ» բալիստիկ հրթիռի արձակման համակարգը Աստրախանի մարզի Կապուստին Յար ռազմակայանում։

ՍԲՈւ ղեկավար Վասիլ Մալյուկի խոսքով՝ գործողությունն իրականացվել է Ուկրաինայի մի քանի հատուկ ծառայությունների համատեղ ուժերով և լիովին հաջող է եղել։

Ուկրաինայի տվյալներով՝ Ռուսաստանը արձակել է մեկ «Օրեշնիկ» հրթիռ, երկրորդը կորցրել է, իսկ առնվազն մեկը դեռ պահում է։ Կրեմլը կարող է այն տեղակայել Բելառուսում, ինչն ըստ Զելենսկու՝ սպառնում է Եվրոպայի մի մասին, քանի որ հրթիռի հեռահարությունը մոտ 5500 կմ է։

Արևմտյան փորձագետները կարծում են, որ «Օրեշնիկ»-ը խորհրդային RS-26 «Ռուբեժ» հրթիռի փոփոխված տարբերակն է, որը կարող է կրել մինչև վեց միջուկային կամ սովորական մարտագլխիկ։
Հրթիռի առաջին կիրառումը եղել է Դնեպր քաղաքին ուղղված հարձակման ժամանակ նոյեմբերի 21-ին։