ԱՄՆ նախկին ազգային անվտանգության խորհրդական Մայքլ Ֆլինը կառավարությունից պահանջել է 50 միլիոն դոլար փոխհատուցում՝ 2016 թվականի նախագահական ընտրություններին Ռուսաստանի միջամտությանը ենթադրյալ ներգրավվածության գործով իր հետապնդման համար։ Այս մասին հայտնել է Bloomberg-ը՝ հղում անելով դատարանի փաստաթղթերին։
Գործակալությունը նշել է, որ ԱՄՆ Արդարադատության նախարարությունը ամռանից ի վեր բանակցություններ է վարում հաշտության շուրջ։ Ֆլինը դատական հայց է ներկայացրել 2023 թվականին՝ պնդելով, որ նախկին հատուկ խորհրդական Ռոբերտ Մյուլլերի կողմից անարդարացիորեն թիրախավորվել է։
Ինչպես ընդգծել է գործակալությունը, Ֆլինը սկզբում իրեն մեղավոր է ճանաչել ընտրությունների ժամանակ Ռուսաստանի դեսպանի հետ իր կապերի մասին ստելու համար, սակայն ավելի ուշ՝ 2020 թվականին, Թրամփը ներում է շնորհել իր նախկին օգնականին։
Ֆլինը այս պաշտոնում աշխատել է 2017 թվականի հունվարի 23-ից մինչև փետրվարի 13-ը։ Նա ստիպված է եղել հրաժարական տալ այն ժամանակվա փոխնախագահ Մայք Փենսին Վաշինգտոնում Ռուսաստանի այն ժամանակվա դեսպան Սերգեյ Կիսլյակի հետ իր զրույցների մասին իբր լիովին չտեղեկացնելու համար։ 2012-ից 2014 թվականներին Ֆլինը եղել է Պաշտպանության հետախուզական գործակալության տնօրեն։
.gif)
