ԱԺ-ում շարունակվում է Ճանապարհային երթևեկության կանոնների խախտումների օրինականության քննարկումը: ՀՀ Ոստիկանության պետի տեղակալ Արթուր Օսիկյանը պատասխանում էր խմբակցությունների գրավոր հարցերին:
ԲՀԿ-ն հարցադրում էր կատարել, թե կանոնների խախտումների համար տուգանքների դրույքաչափերը որքանով են համապատասխան տուգանքի ենթարկված անձանց ունեցվածքին:
«Հարցադրումը ճիշտ է, սակայն անձանց եկամուտները շատ դեպքերում չենք կարող հաշվարկել: Որոշ դեպերում պատիժը պետք է այնպիսին լինի, որ դա կանխարգելիչ նշանակություն ունենա», – նշեց ՀՀ ոստիկանության պետի տեղակալ Արթուր Օսիկյանը:
Նրա խոսքով՝ մեր գործող օրենսդրությամբ նախատեսված տուգանքները շատ դեպքերում համաչափ են: «Սակայն կան որոշ արարքներ, որոնց համար մենք էլ ենք գտնում, որ տուգանքները պետք է նվազեցնել», -նշեց նա:
Հաջորդ հարցն այն էր, թե որքանով է համապատասխանում փողոցում տեղադրած արագաչափերի ցուցիչի թիվը մեքենայի արագաչափի ցույց տված ցուցիչին: Ի պատասխան այս հարցադրման՝ Օսիկյանը նշեց, թե փողոցում տեղադրված արագաչափերի ցուցմունքները լիովին ճիշտ են և համապատասխանում են մեքենայի արագաչափի ցուցիչին: «Այդ սարքերը գերմանական են և գործում են անսխալ», – նշեց նա:
Օսիկյանը նշեց, թե բոլոր խմբակցությունների կողմից հնչել է նույն հարցը, թե ինչու է սպասարկող ընկերություն ընտրվել հենց «Սեքյուրիթի դրիմ» ՍՊԸ-ն:
«2011թ. է կնքվել պայմանագիրը «Սեքյուրիթի դրիմ» ընկերության և ոստիկանության միջև: Մրցույթին մասնակցել է երկու ընկերություն: Մյուս ընկերությունն առաջարկել էր շատ բարձր գին, այդ պատճառով ընտրվել էր «Սեքյուրիթի դրիմ» ընկերությունը, որը համապատասխանում էր անհրաժեշտ բոլոր պահանջներին», – նշեց նա:
.gif)
