ԱՇԽԱՐՀԻ ԱՄԵՆԱԳԵՂԵՑԻԿ ԿԱՆԱՅՔ՝ ԸՍՏ ՈՍԿԵ ՀԱՐԱԲԵՐԱԿՑՈՒԹՅԱՆ

Դոկտոր Ջուլիան Դե Սիլվան անցկացրել է ուսումնասիրություն եւ պարզել, թե ով է համարվում ամենագեղեցիկ կինը՝ ըստ «Ոսկե հարաբերակցության» սկզբունքների։ Ո՞վ է, ձեր կարծիքով, արժանի այս կոչմանը։

Ըստ այդ ուսումնասիրության՝ ամերիկացի դերասանուհի Էմմա Սթոունը գլխավորել է աշխարհի ամենագեղեցիկ կանանց ցանկը։ Դոկտոր Դե Սիլվայի պնդմամբ, Էմմա Սթոունը ցուցադրել է «ոսկե հարաբերակցության» բոլոր տարրերի մեջ բացառիկ կատարելություն։ Նա առանձնացել է իր հոնքերով (94.2%), ծնոտի գծով (97%) եւ շրթունքների համամասնություններով (95.6%)։ Դոկտոր Ջուլիան Դե Սիլվայի ուսումնասիրության համաձայն՝ դերասանուհին ֆիզիկական կատարելության համար ստացել է 94.72%։

Երկրորդ տեղը զբաղեցրել է Զենդայան՝ 94.37% արդյունքով։ Նրա ցուցանիշները նույնպես շատ բարձր են. շրթունքները ստացել են 99.5%, աչքերը՝ 97.3%, իսկ ճակատը՝ 98%։

Հետաքրքիր են նաեւ այն արտիստները, որոնք չհանդիսացան առաջատարներ, սակայն ընդգրկվել են լավագույն տասնյակում։

Այս «ոսկե հարաբերակցության սիրելիների» մեջ են Ֆրիդա Պինտոն, Վանեսա Քիրբին, Ջեննա Օրտեգան (որը ամենաբարձր ցուցանիշն ունեցել է ճակատով՝ 99.6%, բայց դեմքի ձեւի համար ստացել է միայն 88%), Օլիվիա Ռոդրիգոն, Մարգո Ռոբին, Այշվարիա Ռայ Բաչչանը, Թանգ Վեյը եւ Բիյոնսեն։

Դոկտոր Ջուլիան Դե Սիլվան իր ուսումնասիրության մեջ կիրառել է համակարգչային դեմքի քարտեզագրման տեխնոլոգիա, որը հիմնված է ոսկե հարաբերակցության սկզբունքների վրա. մաթեմատիկական մի մոդել, որը մշակվել է հին հույների կողմից։ Այս մեթոդը նախկինում օգտագործվել է նաեւ տղամարդկանց գեղեցկությունը գնահատելու համար, եւ անցյալ տարի Դոկտոր Դե Սիլվան կազմել է նմանատիպ վարկանիշ՝ տղամարդկանց համար։ Առաջին տեղը զբաղեցրել է Աարոն Թեյլոր-Ջոնսոնը՝ 93.04% միավորով։

Ամփոփելով՝ կարելի է ասել, որ թե՛ Դոկտոր Դե Սիլվայի նման չափագրական վերլուծությունները, թե՛ «ոսկե հարաբերակցության» հաշվարկները հետաքրքիր են որպես գիտական-էսթետիկ ուսումնասիրություն։ Սակայն մյուս կողմից գեղեցկությունը միշտ էլ մնացել է սուբյեկտիվ երեւույթ.  այն կախված է մշակույթից, ժամանակի ոճային ճաշակից, անհատական ընկալումներից եւ նույնիսկ անձնական փորձառությունից։ Այդ պատճառով էլ նման վարկանիշները կարող են լինել հետաքրքիր եւ քննարկելի՝ հատկապես հայտնի աստղերի կապակցությամբ, բայց դրանք երբեք չեն կարող ամբողջովին սահմանել, թե ով է «ամենագեղեցիկը». յուրաքանչյուր մարդու համար գեղեցկությունը կարող է դրսեւորվել տարբեր կերպ։

Է. ՄԻՔԱՅԵԼՅԱՆ