Հունվարի 28-ը Հայոց բանակի կազմավորման օրն է:
1991 թվականի դեկտեմբերի 5-ին Հայաստանի նախագահ Լևոն Տեր-Պետրոսյանի հրամանագրով պաշտպանության նախարար նշանակվեց Վազգեն Սարգսյանը: Նա նորանկախ Հայաստանի առաջին պաշտպանության նախարարն էր՝ առանց նախարարության:
1992-ի այս օրը՝ հունվարի 28-ին, կառավարությունը ընդունեց «Հայաստանի Հանրապետության Պաշտպանության նախարարության մասին» որոշում` դրանով իսկ իրավականորեն ազդարարելով Հայոց Ազգային բանակի ստեղծումը:
Իսկ արդեն 1994թ. հունիսից վերջնականապես ընթացք ստացան բանակաշինության, կայուն զարգացման, զորքերի մարտունակության բարձրացման, կարգապահության ամրապնդման, միջին և բարձր սպայական անձնակազմի պատրաստման ու վերապատրաստման աշխատանքները:
Շնորհավորում ենք ՀՀ և ԼՂՀ բոլոր զինծառայողներին՝ շարքայինից մինչև բարձրագույն սպայական անձնակազմ, շնորհավորում ենք հայ ազգին, որ ունի պատիվ՝ սեփական բանակ ունենալու:
Բանակի տոնը ևս մեկ առիթ ու հնարավորություն է կրկին հիշելու բոլոր այն հերոս ազատամարտիկներին, ում նվիրումի ու հաճախ նաև կյանքի գնով ստեղծվեց և կայացավ մեր բանակը:
Հպարտ ենք մեր այն ուսանողներով, շրջանավարտներով և աշխատակիցներով, ովքեր թե՛ Արցախյան առաջին, թե՛ Ապրիլյան քառօրյա, թե՛ 44-օրյա պատերազմների օրերին աննկուն պայքար մղեցին հանուն մեր այսօրվա պաշտպանության:
Երախտապարտ ենք, քանի որ մեր թիկունքում զգում ենք ձեր ուժը, որն էլ մեզ մղում է դեպի հաղթանակներ գիտության ու կրթության ոլորտում:
Խաղաղություն հայոց սահմաններին, համբերություն բոլոր զինվորների ծնողներին, իսկ ձեզ, սիրելի՛ զինվորներ, բարի տունդարձ ենք մաղթում:
Փառք ու պատիվ, նաև երախտիք ու խոնարհում մեր անձնվեր հերոսների հիշատակին:
Շնորհավո՛ր տոնդ, հայկական բանակ և հայ զինվոր:
.gif)
