Թեև նոր կառավարության վերջնական կազմը դեռ հայտնի չէ, այդուամենայնիվ արդեն իսկ պարզ է, որ գործադիրում շատ են Ռոբերտ Քոչարյանի կադրերը: Չնայած նրանք անցած տարիներին բավականին հլու-հնազանդ ծառայել են նաև Սերժ Սարգսյանին, այդուհանդերձ, թե՛ ՀՀԿ թիմի ներսում, թե՛ հանրության մոտ ասոցացվում են առավելապես նախկին նախագահի կառավարման շրջանի հետ:
Քաղաքական բաղադրիչից զատ` սա ունի նաև շատ կոնկրետ քարոզչական նշանակություն` հատկապես, եթե հիշում ենք նախկին վարչապետ Տիգրան Սարգսյանի և Ռոբերտ Քոչարյանի միջև ծավալված հեռակա բանավեճը` երկրի տնտեսական քաղաքականության շուրջ: Եվ հիմա` Տ. Սարգսյանին պաշտոնանկ անելով և նշանակելով քոչարյանական կադրերին՝ վերջինիս տարածքային կառավարման նախարար Հովիկ Աբրահամյանի գլխավորությամբ, Ս. Սարգսյանը, փաստորեն, հրապարակավ խոստովանեց, որ Ռ. Քոչարյանը տարեսկզբի իր քննադատական գնահատականներում միանգամայն իրավացի էր:
Սակայն ինչը ստիպեց, որ Ս. Սարգսյանը գնար նման քայլի: Այստեղ կարող է լինել երեք տարբերակ:
1. Ս. Սարգսյանը դա արեց ռուսական կողմի ճնշման տակ: Այս տարբերակի դեպքում` հավանական է համարվում, որ ռուսական հանձնակատարի դերում հանդես է գալիս Ռոբերտ Քոչարյանը, որն էլ հրահանգել է ԲՀԿ-ին չմտնել կոալիցիա` ասելով` առանց այդ էլ ամեն բան արվելու է այնպես, ինչպես մենք ենք ուզում: Իսկ ԲՀԿ-ին վերապահվել է ընդդիմադիր դաշտին «տիրություն անելու» գործառույթը, որպեսզի այդտեղ անկանխատեսելի խմորումներ չսկսվեն:
2. Գործում է «երկու ղարաբաղցիների չկռվելու» կանոնը, որի մասին, ի դեպ, 2013թ. նախագահական ընտրություններից առաջ հայտարարեց Ռ. Քոչարյանը: Ըստ այդմ` Քոչարյան-Սարգսյան զույգն իր բոլոր քայլերն իրականացնում է փոխհամաձայնեցված: Եվ նոր վարչապետին ՀՀԿ-ին ներկայացնելիս Ս. Սարգսյանի ակնարկը` չարախնդալու մասով, ինչպես նաև դրան ի պատասխան` Քոչարյանի վերջին հարցազրույցում Սարգսյանին ուղղված կշտամբանքը զուտ իմիտատիվ բնույթ են կրում: ՀՀԿ-ի սիրած բառապաշարով ասած` «պասերով աշխատելու» ղարաբաղյան այս ավանդական գործելաոճով` Սարգսյանն ու Քոչարյանը պատրաստվում են անխոչընդոտ կերպով 2018-ին դարձյալ փոխվել տեղերով: Ընդ որում` ՍԴ փոփոխությունները դրան որևէ կերպ չեն խանգարում:
3. Նշանակելով քոչարյանական կադրերին` Սերժ Սարգսյանը միտումնավոր է փորձում շատերի մոտ տպավորություն ստեղծել, թե ինքը Ռ. Քոչարյանի հետ որևէ խնդիր չունի` հարկ եղած դեպքում դա օգտագործելով ՀՅԴ-ի և հատկապես ԲՀԿ-ի հետ իր ծրագրերում:
Թե այս տարբերակներից որն է առավել հավանական, դժվար է միանշանակ ասել: Բայց այն, որ մեր երկրում այդպես էլ նոր առաջնորդներ, նոր նախարարներ և նոր քաղաքական գործիչներ չեն ծնվում, մեղմ ասած, մտահոգիչ է:
.gif)
