ՀՀ բարձր տեխնոլոգիական արդյունաբերության նախարարությունը հայտնում է, որ 2026 թվականի մարտի 2-5-ը Իսպանիայի Թագավորության Բարսելոնա քաղաքում կկայանա «Համաշխարհային բջջային կոնգրես 2026-ը (Mobile World Congress Barcelona 2026)», որին մասնակցություն կունենա նաև Հայաստանը։
Նախարարությունը «Համաշխարհային բջջային կոնգրես 2026»-ում նախատեսում է ներկայացնել հայկական տեխնոլոգիական էկոհամակարգը և հնարավորություն ընձեռել ոլորտային կազմակերպություններին որպես այցելու մասնակցել միջոցառմանը՝ ներկայացնելով իրենց կողմից առաջարկվող արտադրանքը, լուծումները, ինչպես նաև նոր գործարար կապեր հաստատելու միջազգային գործընկերների հետ:
Այս միջոցառման անցկացման համար ՀՀ բարձր տեխնոլոգիական արդյունաբերության նախարարությունը պայմանագիր է կնքել Nuevo Design Event Organizing LLC ընկերության հետ։ Պայմանագիրն արժեցել է 94,700 եվրո, որը համարժեք է 42 մլն 400 հազար դրամի։
Որպես կանխավճար տրվել է 28,410 եվրո՝ մոտ 12 մլն 410 հազար դրամ։
Պայմանագիրն իր մեջ ներառում է «Armenia» գրությամբ տաղավարի պատրաստումը՝ հատակից մինչև վարդակներ։
Նախարարությունը հոգալու է ցուցահանդեսային տարածքի վարձակալության, կառուցապատման և ցուցահանդեսի մուտքի ծախսերը: Ավիատոմսի և կեցության հետ կապված ծախսերը հոգալու են ընտրված կազմակերպությունները:
Էմմա Միքայելյան
.gif)
