ԱՄՆ-ը չի աջակցել ԵՄ-ին ռուսական նավթի սահմանափակման հարցում

Եվրոպական միությունը չի կարողացել ապահովել ԱՄՆ-ի և «Մեծ յոթնյակի» (G7) երկրների աջակցությունը՝ ռուսական նավթի մատակարարումները համատեղ արգելափակելու նպատակով նախատեսված հակառուսական պատժամիջոցների 20-րդ փաթեթի շրջանակում։ Այս մասին Բրյուսելում դիվանագիտական աղբյուրը հայտնել է TASS գործակալությանը։

Աղբյուրի փոխանցմամբ՝ ԵՄ-ն ԱՄՆ-ին և G7 երկրներին ներկայացրել է առաջարկ՝ ամբողջությամբ արգելել եվրոպական ընկերություններին ռուսական նավթի փոխադրումը, ինչպես նաև ռուսական նավթ տեղափոխող լցանավերին սպասարկման, մատակարարման, ֆինանսավորման և ապահովագրության ծառայությունների տրամադրումը՝ անկախ նրանից, թե ինչ դրոշի տակ են դրանք նավարկում։

Եվրահանձնաժողովը գործընկերներին կոչ է արել նմանատիպ սահմանափակումներ կիրառել նաև իրենց ընկերությունների նկատմամբ, սակայն ԱՄՆ-ը հրաժարվել է աջակցել նախաձեռնությանը։

Դիվանագետը հավելել է, որ չի բացառվում, որ Վաշինգտոնը հետագայում սեփական միջոցներ ձեռնարկի՝ իր պայմաններով և իր ժամանակացույցով։

Մյուս G7 երկրները, ըստ աղբյուրի, նշել են, որ տեսականորեն հնարավոր է միանալ ԵՄ պատժամիջոցներին, սակայն հստակ պարտավորություններ չեն ստանձնել։

 Թարգմանությունը՝ Անի Վարդանյանի