Պահքի սեղան. Մոխոխ ապուր. ինչպե՞ս պատրաստել այն

Այսօր Մեծ Պահքի տասնվեցերորդ օրն է։ Այն տեւում է 48 օր՝ Բուն Բարեկենդանից մինչեւ Սուրբ Հարության տոն (Զատիկ)։
Պահքի շրջանում օգտագործում են բացառապես բուսական ծագում ունեցող սննդամթերք:

Ուստի՝ ArmLur.am-ը Մեծ Պահքի ողջ ընթացքում կներկայացնի բուսական կերակրատեսակներ, որոնք կարելի է ուտել պահքի ժամանակ։

Մախոխ ապուրն

Մախոխ ապուրը արևմտահայկական (Կարին, Սասուն) ավանդական թթվաշ ապուր է, որն ավանդաբար պատրաստվում է պահքի առաջին օրերին։ Այն սովորաբար պարունակում է բլղուր, սոխառած, լոլիկ կամ տոմատի մածուկ, հոնի չիր կամ թթու դրած կանաչի, և Պահքից հետո՝ երբեմն նաև մսով կոլոլակներ։

Ապուրը պատրաստելու համար անհրաժեշտ է բլղուր (ձավար), սոխ, բուսական յուղ, հոնի չիր, տոմատ, թթու բանջարեղեն, կանաչի (սամիթ)։

Ապուրը պատրաստվում է բոլոր բաղադրիչները միասին եփելով մինչև թանձրանալը։ Կարինի և Սասունի հայերը պահքի առաջին օրը պարել են «Մախոխապուրի պարը»՝ առանց երաժշտության։

Միշտ հիշե՛ք․ պահքի ընթացքում հրաժարվում են ոչ միայն որոշակի կերակուրներից, այլև մոլի սովորություններից, շատախոսությունից, ստախոսությունից, հայհոյանքից և այլ մեղքերից: Կերակրից հրաժարվելն առանց մեղքից հետ կանգնելու` անիմաստ ու անօգուտ է, որովհետեւ «սատանան միշտ պահքի մեջ է, ոչինչ չի ուտում, բայց մեղք գործելուց չի դադարում եւ չի հոգնում» (Սուրբ Գրիգոր Տաթեւացի):

Միշտ հիշե՛ք․ պահք պահում ենք մենք մեզ համար, մեր մեղքերից, վատ սովորություններից ազատվելու համար, այլ ոչ ցուցադրության համար։ Մատթեոս 6։16-18-ում գրված է․ «Երբ ծոմ պահեք, տրտմերես մի լինեք կեղծավորների նման, որոնք իրենց երեսներն այլանդակում են, որպեսզի մարդկանց այնպես երևան, թե ծոմ են պահում, ճշմարիտ եմ ասում ձեզ, այդ իսկ է նրանց վարձը, այսինքն` մարդկանց երևալը և նրանցից գովվելը: Այլ երբ դու ծոմ պահես, օծի քո գլուխը և լվա քո երեսը, որպեսզի չերևաս մարդկանց ծոմ պահող, այլ քո Հորը, գաղտնաբար, և քո հայրը, որ տեսնում է, ինչ որ ծածուկ է, կհատուցի քեզ»:

Նանիկ Աղասյան