ԱՄՆ-ն և Իսրայելը զարմացած են Իրանի դիմադրողականությունից. Իսլամական հեղափոխության պահապանների կորպուսի խորհրդական

Իսլամական հեղափոխության պահապանների կորպուսի (ԻՀՊԿ) հրամանատարի խորհրդական Համիդ Ռեզա Մողադամֆարը հայտարարել է, որ ԱՄՆ-ն և Իսրայելը անակնկալի են եկել Իրանի ռազմական գործողությունների ծավալից և իրանական ժողովրդի ու պետական համակարգի դիմադրողականությունից։

Al Jazeera հեռուստաալիքին տված հարցազրույցի ընթացքում Մողադամֆարը նշել է, որ Վաշինգտոնն ու Թել Ավիվը չեն կարողացել հասնել իրենց նպատակներին Իրանի դեմ սկսած ռազմական գործողություններից հետո։

Նրա խոսքով՝ հակառակորդները իրականացրել են լայնածավալ հարձակումներ, որոնց ընթացքում,  իրանական կողմի ունեցել է բազմաթիվ զոհեր։ ԻՀՊԿ խորհրդականը նշել է, որ հակառակորդները սպասում էին, թե առաջնորդի մահից հետո Իրանի կառավարման և ռազմական համակարգը կխախտվի, սակայն, նրա խոսքով, այդ հաշվարկը լիովին ձախողվել է։

Մողադամֆարի պնդմամբ՝ Իրանը պատասխանել է լայնածավալ հրթիռային և անօդաչու թռչող սարքերի հարվածներով, ինչի հետևանքով ԱՄՆ-ը և Իսրայելը բախվել են պաշտպանական և հարձակողական միջոցների պակասի հետ։

Նա նաև ընդգծել է, որ Իրանը պատրաստ է երկարատև պատերազմի, և ժամանակի գործոնը, ըստ նրա, աշխատում է Իրանի ռազմական կարողությունների օգտին։

ԱՄՆ-ը և Իսրայելը, ըստ հաղորդման, հարվածներ են հասցրել Իրանին փետրվարի 28-ի առավոտյան։ Իրանը պատասխան գործողություն է սկսել «True Promise 4» ռազմական գործողության շրջանակում՝ հրթիռային և անօդաչու թռչող սարքերի հարվածներ հասցնելով Իսրայելի թիրախներին և տարածաշրջանում գտնվող ամերիկյան ռազմաբազաներին։

«True Promise 4» գործողությունը, ըստ իրանական կողմի, հանդիսանում է պատասխան քայլ ԱՄՆ-ի և Իսրայելի կողմից Իրանի դեմ իրականացվող ռազմական գործողություններին։

Թարգմանությունը՝ Անի Վարդանյանի