ArmLur.am-ի տեղեկություններով՝ կառավարության վաղվա նիստում ՀՀ էկոնոմիկայի նախարար Գևորգ Պապոյանը պատրաստվում է հերթական անգամ մի շարք ընկերությունների տրամադրել մաքսատուրքից ազատման արտոնություններ։
Խոսքը ներդրումային ծրագրերի շրջանակում ներմուծվող սարքավորումների և հումքի համար մաքսատուրք չվճարելու հնարավորության մասին է, ինչը բիզնեսների համար փաստացի նշանակում է զգալի ֆինանսական արտոնություն պետության կողմից։
ArmLur.am-ի տեղեկություններով՝ այս անգամ կառավարության «արտոնյալների ցանկում» հայտնվել են 6 ընկերություններ և մեկ անհատ ձեռնարկատեր։
«ՊԱՊՐԻԿԱ» ՍՊԸ
Արտոնություն կտրամադրվի «ՊԱՊՐԻԿԱ» ՍՊԸ-ին։ Ընկերությունը զբաղվում է սննդամթերքի ներմուծմամբ և սննդարդյունաբերության համար անհրաժեշտ բաղադրիչների մատակարարմամբ։
Բաց աղբյուրներում ընկերության մասին հրապարակային տեղեկությունները բավական սահմանափակ են, ինչը հաճախ բնորոշ է այն ընկերություններին, որոնք հիմնականում աշխատում են ներմուծման շուկայում և պետական ծրագրերի շրջանակում են ակտիվանում։
«ԲԵԿՈՆ ՊՐՈԴՈՒԿՏ» ՍՊԸ
Արտոնություն կստանա նաև «ԲԵԿՈՆ պրոդուկտ» ՍՊԸ-ն։ Ընկերությունը գործում է մսամթերքի արտադրության ոլորտում և զբաղվում է խոզի մսի վերամշակմամբ ու մսամթերքի արտադրությամբ։
Մաքսատուրքից ազատման արտոնությունը ընկերությանը հնարավորություն կտա ավելի էժան ներմուծել արտադրական սարքավորումներ և հումք, ինչը հաճախ կառավարության կողմից հիմնավորվում է «արտադրության խթանման» անհրաժեշտությամբ։
«ՌՈՅԱԼ ԳԼԱՍ ԳՐՈւՊ» ՍՊԸ
Արտոնություն կստանա նաև «ՌՈՅԱԼ ԳԼԱՍ ԳՐՈւՊ» ՍՊԸ-ն։
Հատկանշական է, որ ընկերությունը նմանատիպ արտոնություն ստացել էր դեռևս 2018 թվականին։ Այդ ժամանակ հայտարարվել էր, որ Կոտայքի մարզի Նոր Գեղի գյուղում նախատեսվում է զարգացնել պտղատու այգիներ, կառուցել սառնարանային պահեստներ և ընդլայնել հյութերի արտադրությունը։
Այսինքն՝ նույն ընկերությունը արդեն երկրորդ անգամ է հայտնվում պետական արտոնությունների ցանկում։
«ԳԼՈՐԻԱ» կարի ֆաբրիկա
Կառավարությունը արտոնություն է տրամադրելու նաև «ԳԼՈՐԻԱ» կարի ֆաբրիկային։
«Գլորիան» Հայաստանի թեթև արդյունաբերության խոշոր ընկերություններից է, որը համագործակցում է միջազգային բրենդների հետ և հիմնականում արտադրանքն արտահանում է Եվրոպա։
Նման ծրագրերի շրջանակում նախկինում ևս թեթև արդյունաբերության ընկերություններին պետությունը տրամադրել է հարկային կամ մաքսային արտոնություններ։
Անհատ ձեռնարկատեր Սերգո Խաչոյան
Արտոնություն կտրամադրվի նաև անհատ ձեռնարկատեր Սերգո Խաչոյանին։
Վերջինս նախատեսում է ներդրումային ծրագրի շրջանակում ներմուծել սարքավորումներ, որոնք ևս կազատվեն մաքսատուրքից։
«ԲԵՏՈՆԱԳՈՐԾ» ՓԲԸ
Կառավարության արտոնությունների ցանկում է նաև «ԲԵՏՈՆԱԳՈՐԾ» փակ բաժնետիրական ընկերությունը։
Ընկերությունը զբաղվում է շինարարական նյութերի արտադրությամբ՝ մասնավորապես բետոնե և երկաթբետոնե կոնստրուկցիաների արտադրությամբ, որոնք օգտագործվում են շինարարության մեջ։
Վաղվա կառավարության նիստում այս հարցերը ներկայացնելու է ՀՀ էկոնոմիկայի նախարար Գևորգ Պապոյանը։
Սոնա Գրիգորյան
.gif)
