ՏԵՍԱՆՅՈՒԹ․ Դավթաշենում ՔՊ անդամին սպանողին բանտից տուն են ուղարկել․ ինչ է կատարվում

Դավթաշենում «Քաղաքացիական պայմանագիր» կուսակցության Դավթաշեն տարածքային կառույցի անդամի սպանության գործով կալանավորվածին բանտից տուն են ուղարկել:

ArmLur.am-ին հասած տեղեկությունների համաձայն՝ ՀՀ քննչական կոմիտեից հայտնի դարձավ, որ նրան կալանքը փոխարինվել է տնային կալանքով, իսկ քրեական գործով նախաքննությունը շարունակվում է: 33-ամյա Շմավոն Աթոյանը, որը հանդիսացել է «Քաղաքացիական պայմանագիր» կուսակցության Դավթաշեն տարածքային կառույցի անդամ սպանվել էր 2025 թվականի հոկտեմբերի 25-ին ArmLur.am-ի բացառիկ տեղեկություններով՝ սպանության պատճառը եղել է աղջկա հետ կապված հարց․ վերջինիս նեղացնելու դեպքը ստեղծել է լարվածություն, ինչի հետևանքով էլ հնչել է կրակոց, և սպանվել է 33-ամյա երիտասարդը։

ՆԳՆ-ն պաշտոնապես հայտնել է, որ հոկտեմբերի 25-ին՝ կեսգիշերից անց, ոստիկանության օպերատիվ կառավարման կենտրոնից Քրեական ոստիկանության Երևանի քաղաքային վարչություն հաղորդում է ստացվել, որ Դավթաշենի երրորդ թաղամասում վիճաբանություն է եղել։ Նշված վայր է մեկնել օպերատիվ խումբ։ Մինչ իրավապահները ձեռնարկում էին անհետաձգելի գործողություններ, «Արմենիա» բժշկական կենտրոնից հաղորդվել է, որ հրազենային վիրավորումով բուժօգնության տեղափոխված 33-ամյա Շմավոն Աթոյանը գիտակցության չգալով մահացել է։ Բացահայտման աշխատանքներին միացել են նաև Քրեական ոստիկանության գլխավոր վարչության ծառայողները։

Դեպքի վայրում հայտնաբերվել է 9 մմ տրամաչափի կրակված մեկ փամփուշտ։ Կազմված փաստաթղթերն ուղարկվել են Աջափնյակ և Դավթաշեն վարչական շրջանների քննչական բաժին։ Երևանի քրեական ոստիկանների ձեռնարկած միջոցառումներով պարզվել է, որ հանցագործությունը կատարել է մայրաքաղաքի Գևորգ Էմինի փողոցի բնակիչ՝ 30-ամյա մի երիտասարդ։ Վերջինս կալանավորվել էր , սակայն խափանման միջոցի կալանքը օրերս փոխարինվել է տնային կալանքով:

Քնար Մանուկյան

Մանրամասները՝ տեսանյութում․