Վերջին օրերին, երբ մեկը մյուսի հետևից ՀՀ Կառավարության անդամներ են նշանակվում հին ու նոր դեմքեր, մամուլն ու քաղաքական շրջանակները փորձում են տեղեկություններ հայթայթել, թե ով ինչ պաշտոնի կնշանակվի: Որոշ դեպքերում հաջողվում է ճիշտ տեղեկություններ որսալ, որոշ դեպքերում՝ ոչ: Ինչո՞ւ է այդպես:
Armlur.am-ը տեղեկություններ ստացավ այն մասին, որ գրեթե բոլոր նորանշանակ նախարարներին Սերժ Սարգսյանն անձամբ կանչում է իր մոտ, հայտնում իր մտադրությունը՝ նրան նախարար նշանակելու մասին: Սակայն դնում է մեկ նախապայման՝ որևէ տեղ ոչինչ չխոսել այդ մասին:
Արդեն գործադիրում աշխատանքի անցած նախարարներից մեկը armlur.am-ի հետ զրույցում ասաց, որ սովորաբար Սերժ Սարգսյանը երբ որևէ մեկին որևէ պաշտոնի նշանակելու նպատակ է ունենում, առաջինը պահանջում է գաղտնի պահել նշանակման մտադրության մասին տեղեկությունը՝ անգամ եթե դրա հրապարակման համար մնացել է ընդամենը մի քանի ժամ:
Թե ինչն է Սերժ Սարգսյանի այս գաղտնապահության պատճառը, դժվար է ասել, բայց փաստ է, որ նա փորձում է ցանկացած հարցում ինտրիգը պահել մինչև վերջին վայրկայնը: Ու հենց այս իրավիճակն է, որ շատ հարցերում անհասկացվածություն է առաջացնում, և քաղաքական ու ոչ քաղաքական շրջանակները սկսում են իրենց ասելիքը կառուցել ենթադրությունների վրա:
Անի Ստեփանյան
.gif)
