Ազգային ժողովի նախագահի ընտրություններից հետո խորհրդարանի նորընտիր ղեկավար Գալուստ Սահակյանի կենսագրական տվյալները միանգամից հայտնվեցին Ազգային Ժողովի կայքում, իսկ կենսագրության մեջ էլ ավելացավ ՀՀԿ խմբակցության ղեկավար պաշտոնը:
Խորհրդարանի նախագահի ընտրությունների հաջորդ օրը տեղի ունեցավ ԱԺ պետական-իրավական հարցերով մշտական հանձնաժողովի նախագահի ընտրություններ: Հիշեցնենք, որ այդ հանձնաժողովի նախագահի պաշտոնը թափուր մնաց Դավիթ Հարությունյանի՝ Կառավարության աշխատակազմի ղեկավար-նախարար նշանակվելուց հետո:
Տեղի ունեցած ընտրությունների արդյունքներով պետաիրավական հարցերի հանձնաժողովի նախագահ ընտրվեց ՀՀԿ-ական թեկնածու, խմբակցության քարտուղար Հովհաննես Սահակյանը: Սակայն Ազգային Ժողովի կայքն այս անգամ չի ցուցաբերում այն նույն ակտիվությունն ու օպերատիվությունը՝ ինչ ցուցաբերեց Գալուստ Սահակյանի ընտրվելուց հետո: Խորհրդարանի կայքում հանձնաժողովը դեռ նախագահ չունի:
Նույն իրավիճակն է տիրում նաև Եվրոպայի խորհրդի խորհրդարանական վեհաժողով (ԵԽԽՎ)-ի դեպքում: Դեռևս ապրիլի 26-ին ՀՀԿ Գործադիր մարմնի և խորհրդի նիստերից հետո որոշվեց, որ ԵԽԽՎ հայաստանյան պատվիրակության ղեկավար կլինի ԱԺ փոխնախագահ Հերմինե Նաղդալյանը: Նա այդ պաշտոնում կրկին փոխարինելու է Դավիթ Հարությունյանին: Պետք է նշել, որ այս դեպքում էլ ԱԺ-ի կայքը չի «շտապում» նրան պատվիրակության ղեկավար ներկայացնելու հարցում:
.gif)
